قندوز ولایتی ولایت کینگشی، مملکت حربی کوچلری ولایت مرکزینینگ شمالشرقیدهگی استراتیژیک 13 قیشلاقنی « اوروشسیز طالبانگه» تاپشیرگن دیگن. اوشبو قیشلاقلر یقینده ملی کوچلر کنترولیگه اوتگنلیگی ایتیلهدی.
قندوز ولایتی ولایت کینگشینینگ باشلیغی امرالدینولی، ملی کوچلر آغیر مشقتلر نتیجهسیده مذکور منطقهلرنی دولت قوراللی مخالفلری اشغالیدن آزاد قیلگن ایدی دیدی. لیکن، ملی کوچلرنینگ تفاوتسیزلیگی عاقبتیده اوشبو قیشلاقلر قیته-دن جنگری طالبان تصروفیگه اوتگن دیدی جناب ولی.
جناب ولی، حضرت سلطان، عربها، اورتهبلاقها، چبرمه، ایشانها و باشقه نیچه قیشلاقنینگ ییرلیک اهالیسی مردمی کوچ چهارچوبهسیگه کیریب، مذکور منطقهلرنی طالبلر هجومیدن سقلش توغریسیده تیارلیک کورستگن، اما بولرنینگ ایستهگی اعتبارگه آلینمهگن دیدی.
کوماندو حربیلرینینگ سوزلاوچیسی احمدجاوید سلیم، 14 کون تازهلش عملیات سونگ قندوز شهرینینگ 13 قیشلاغی ولایتنینگ حربی کینگشی قراری نتیجهسیده کوماندو حربیلر منطقهدن آلیب چیقیلدی و محلی حکومت ایسه سونگی دقیقهلرگچه هم مذکور ساحهلرنی سقلش اوچون حاضر بولمهدی دیدی.
جناب سلیمگه کوره، کوماندونینگ اساسی بورچی منطقهلرنی جنگری طالباندن تازهلش دیر و باشقه حربیلر ایسه منطقه امنیتینی تامین قیلیش اوچون مسوولیتلی دیر. بیراق، کوماندو کوچلر قیشلاقلردن چیققن پیت، منطقه سقلهنیب قالیشی اوچون بیرته هم حربی عسکر یوق ایدی دیگن سلیم.
نامی فاش ایتیلمسلیک شرطی بیلن سلاموطندارگه صحبت بیرگن ولایت والیسی ادارهسی نینگ بیر منبعی، منطقهلر سقلهنیب قالیش مقصدیده ملی اردو و ملی پولیس کوچلر اعتبار بیرمهگنلیگی سبب قیشلاقلر قیتهدن طالبان اشغالیگه اوتدی دیدی.
بو قبیل عیبلاولرنی رد قیلگن قندوز پولیس قوماندانی، مذکور منطقهدن حربی کوچلرنی آلیب چیقیش امنیتی حربیلرنینگ کوچسیزلیگی معنیسیده ایمس دیگن.
قندوز پولیس قوماندانی، اوشبو عملیاتلرده، دولت قوراللی مخالفلری بولمیش طالباننینگ40 اعضاسی اولدیریلگن و 50تهسی یرهلنتیریلگن دیدی.
لیکن، اوزینی قوراللی طالبلرنینگ سوزلاووچیسی دیب تانیشتیرگن ذبیحالله مجاهد، افغان ملی کوچلر 14کونلیک حربی عملیاتده شکستگه روپه ره بولگنلیگینی ادعا قیلگن. عملیات باشلنگندن بیری طالباننینگ 8 نفری اولدیریلیب و 5تهسی یرهلنتیریلگن دیگن مجاهد.