.JPG)
قندهار محلی مسووللری نینگ ایتیشیچه، قوشمه امنیتی کوچلر ننگرهار و پکتیا ولایتلریدن سونگ، اوشبو ولایتده حربی نمایش اوتکزگنلر.
اوشبو حربی نمایش بوگون "یکشنبه" امنیتی کوچلر تامانیدن قندهار ولایتی نینگ سپینبولدک تومنیده دیورند چیزغیسی یقینیده اوتکزیلگن.
بو نمایشده ملی اردو، ضربتی قطعه، چیگره کوچلری و هوایی کوچلر ینگیل و آغیر قوراللر بیلن کوچلرینی نمایشگه قویگن.
قندهار حاکمی سوزلاوچیسی بهیر احمدی نینگ ایتیشیچه، امنیتی کوچلر اوشبو نمایش آرقهلی اهالی یانیده قالیشلری و اولرنینگ قربانلیکلرینی ایسدن چیقارمهیشلرینی کورستگن.
جناب احمدیگه کوره، ملی مدافعه وزیرلیگی نینگ ییریک مقاملریدن بیرقطاری امنیتی کوچلرنینگ اوشبو نمایشلرینی یقیندن نظارت قیلگن.
ملی خوفسیزلیک کینگشی سوزلاوچیسی جاوید فیصل نینگ توییتر صحیفهسیده یازیشیچه، اوشبو حربی نمایش هییت کونیده پاکستان حربیلری تامانیدن اولدیریلگن عسکرلرنینگ ناملریده اوتکزیلگن.
ملی اردو باش قومندانی یاسین ضیا مذکور نمایشدن نظارت قیلیش اوچون قندهار ولایتیگه بارگن. اونینگ ایتیشیچه، امنیتی و دفاغی کوچلر یوقاری و مسلکی اوروش ظرفیتلریگه ایگه دیر.
بوندن آلدین پکتیا ولایتی نینگ آریوبزازی و ننگرهار ولایتی نینگ گوشته تومنیده امنیتی کوچلر تامانیدن حربی نمایش اوتکزیلگن ایدی.
