.jpg)
د افغانستان د ازادو او عادلانه ټاکنو بنسټ یا فیفا چارواکي وايي، چې د دوی د موندنو له مخې، ملي شورا په خپله ۱۶مه دوره کې د قانون جوړولو له امله خپلې دندې په بریالي ډول پرمخ وړې دي.
د ملي شورا له ۱۶مې دورې د دغه بنسټ څېړنې بله برخه په ډاګه کوي، چې د ولسي او مشرانو جرګو غړو په ۱۳۹۵ لمریز کال کې د تېر کال په پرتله د ولس ستونزو ته د رسیدنې په برخه کې پاتې راغلي دي.
د فیفا بنسټ د پارلمانې څانګې مسوول حسیب معترف د دوشنبې په ورځ (فبروري ۲۷مه) کابل کې خبري غوندې ته د پورته ویناوو د څرګندولو ترڅنګ زیاته کړه، چې ملي شورا په دغه موده کې ۴۱ سندونه چې د قوانینو طرحې او تقنیني فرمانونه هم پهکې شامل دي تصویب کړي دي.
د نوموړي پر خبره، تیرکال ولسي جرګې د ۲۵ قوانیو طرحې تصویب کړې وې، چې په همدې بنسټ سږنی کال څه باندې ۳۹ سلنه زیاتوالی د ملي شورا داستازو په کړنو کې راغلي دي.
معترف زیاته کړه، چې ولسي جرګې له ۳۸ نړیوالو هوکړو ۳۷ هوکړې تصویب کړي دي او همدارنګه د قانون درې طرحې، چې دوه تقنیني فرمانونه هم پهکې شامل دي د ولسي جرګې له خوا رد شوي دي.
د دوی د څېړنو په بله برخه کې بیا راغلي، چې ملي شورا له ولسه استازیتوب په برخه کې بریالۍ نه وه.
له بل لوري بیا، د ولسي جرګې استازی جعفر مهدوي په غونډه کې د فیفا بنسټ موندنې برعکس بولي.
هغه وايي، چې د ولس استازي ټوله ورځ د خپلو موکلینو دوسیو ته پر رسېدنې تېروي، نو ځکه يې د قانون جوړونې دنده هیره کړې.
مهدوي دا هم وايي، داسې وکیلان هم شته چې د قانون په برخه کې سلیقوي چلند کوي او په مجلس کې سنتي او توکمیز ذهنیت ددې سبب شوی دی، چې په سمه توګه د قانون تصویب ته پام ونشي.
بلخوا د ولسي جرګې د دارالانشا مسوولینو بیا سلاموطندار ته ویلي، چې په ۱۳۹۵ کال کې دغه مجلس د قانون ۳۱ طرحې تصویب کړې او ۸ نورې يې رد کړې دي.
د دوی پر وینا، په ټوله کې ولسي جرګې د قانون ۸۹ طرحې، مصوبې او نړیوال سندونه تصویب کړي، چې د ۱۳۹۴ کال په پرتله د قانون جوړونې په برخه کې ۲۰ سلنه زیاتوالی ښايي.
دا په داسې حال کې ده، چې اوس زیاتره عام وګړي د ولسي او مشرانو جرګې وکیلان په خپلو دندو کې په ناغيړۍ او خپلو جیبونو په ډکولو تورنوي.
دوی ادعا کوي، چې زیات شمېر وکیلان د هېواد او خلکو په غم کې نه، بلکې د خپلو شخصي ګټو په موخه هلې ځلې کوي.