مملکت، باله تربیه‌لش مرکزلری مسؤولی‌نینگ ایتیشیچه، اداری فساد باعث، باش پناه‌سیز باله‌لرگه دقت قیلینمه‌یدی. بو مسؤول‌گه کوره، ولایت‌لرده باله‌لر تربیه‌لش مرکزلریده‌گی باله‌لر وضعیتی یمانله‌شیب کیتگن.
باله تربیه‌لش مرکزلر عمومی باشلیغی سیدعبدالله هاشمی، اوتکن کون پنج‌شنبه، باله تربیه‌لش مرکزلریده‌گی باله‌لرگه ساوغه بیریش مراسم‌ده، مملکت باله تربیه‌لش مرکزیده‌گی قیینچی‌لیک‌لر حل ایتیلیشی و اصلاحات کیلتیریلیشی‌نی سوره‌دی.
اونگه کوره، ولایت‌لرده باله تربیه‌لش مرکزلریده‌گی باله‌لر اوچون یوز فایز بودجه اجره تیله‌دی. بیراق اون فایزی‌هم بو باله‌لرگه ییتیشتیریلمه‌یدی.
جناب هاشمی، باله تربیه‌لش مرکزلریده‌گی باله‌لر ساغلیگی و تربیه‌لش وضعیتی‌نی یمان دیدی.
اونگه کوره، 80 دولتی و خصوصی باله تربیه‌لش مرکزیدن گینه 30 مرکزی، 70 فایز معیارنی رعایت قیله‌دی.
عین حالده، باله تربیه‌لش مرکزلریده‌گی باله‌لرنینگ ایتیشیچه، اوتمیش‌لرده دولت اورگه‌تیش خذمت‌لری و تحصیلی بورسیه‌لرنی اختیارلریگه قویه‌دی، بیراق نیچه پیت‌لردن بویان اولرنینگ وضعیتی‌گه دقت قیلینمه‌یدی.
مملکت بیرینچی خانمی «بی‌بی‌گل» دفتری باشلیغی هوسی وردک، بو مراسم‌ده حضور کیلتیریب ایتیشیچه، باله تربیه‌لش مرکزلرینی قوریلیش سیستمی‌گه قیته‌تیکلش لازم.
اونینگ ایتیشیچه، باله تربیه‌لش مرکزلریگه خذمت قیلیش یالغیز اجتماعی ایشلر وزیرلیگی مسؤولیتی ایمس دیر و بو قیینچی‌لیک‌لرنی حل ایتیش اوچون باشقه وزیرلیک‌لرهم همکارلیک قیلیشی کیره‌ک.
باله‌لر تربیه‌لش ریاستی‌نینگ رقمی‌گه کوره، مملکت بویلب 120 مینگ باش پناه‌سیز باله موجود و بو جمله‌دن یالغیز 10 فایزی دولتی و خصوصی باله تربیه‌لش مرکزی دقتی آستی‌گه بولگن.
