فراه کې ملا امام د ۳ کورنیو ۱۱ غړي وژلي

فراه کې د یوه جومات ملا امام د ۳ کورنیو پر غړیو ډزې کړي چې له کبله یې ۱۱ کسان وژل شوي او ۵ نور ټپیان دي.

د فراه د ولایتي شورا مرستیال شاه‌محمود نعیمي سلام‌وطندار ته وویل چې یاده پېښه پرون مازدیګر د دغه ولایت د خاک‌سفېد ولسوالي په اړوند سیمه کې شوې ده.

د نوموړي په وینا، دغه ملا لومړی د خپلې کورنۍ پر غړیو ډزې کړي، خو کله چې یې دوه ګاونډیان د پېښې مخنیوي لپاره اقدام کوي، د هغوی کورونو ته ورځي او د کورنیو پر غړیو یې ډزې کوي.

د فراه د ولایتي شورا مرستیال وايي چې د وژل شویو کسانو په ډله کې ۷ ښځې او ۲ ماشومان هم شامل دي.

نعیمي زیاتوي، یاده پېښه د طالبانو تر واکمنۍ لاندې سیمه کې شوې او کېدای شي قاتل د طالبانو له لوري نیول شوی وي.

تراوسه د دې پېښې انګېزه روښانه نه‌ده.

په همدې حال کې د فراه امنیه قومانداني هم دا پېښه تاییدوي، خو وايي چې د قربانیانو شمېر تراوسه نه‌دی مشخص شوی.

سلام‌وطندار ته د یادې پېښې یوه ویډیو رسېدلې چې درې جسدونه په‌کې لیدل کېږي. په ویډیو کې د کورنیو د نورو غړیو د ژړاوو غږ هم اورېدل کېږي.