بوگون «سه‌شنبه» ایرته‌لب بامداد چاغی ساعت 2 اطرافیده قوراللی طالب‌لر نیچه تاماندن فراه شهری‌نینگ اوستیگه هجوم قیلگن و حاضر مذکور ولایت‌نینگ ملی خوفسیزلیک ریاستی طالب‌لر تامانیدن نظارت گه آلینیب اوتگه یاندیریلگن و عین حالده، شهرده امنیتی کوچلر و طالب‌لر آره‌سیده آتیشمه دوام ایتماقده.
فراه یشاوچیلریدن بیرقطاری‌نینگ ایتیشیچه، قوراللی طالب‌لر اویلردن سنگر صفتیده فایده‌لنه‌دی و اهالی شهردن قاچیب چیقماقده دیر.
اولرنینگ ایتیشیچه، مذکور ولایت‌نینگ پولیس قومندانلیگی خوفسیزلیک آمری هم هلاک ایتیلگن.
فراه ولایتی کسلخانه‌سیدن آتی فاش ایتیلیشی‌نی ایستمه‌گن بیر منبع‌نینگ سلام‌وطندارگه ایتیشیچه، حاضرگچه اوشبو کسلخانه‌گه امنیتی کوچلردن 2 جسد و 16 یره‌دار و شونینگدیک، تینچ اهالی‌دن 5 یره‌دار آلیب کیلینگن.
عین حالده، فراه ولایتیده حربی کوچلر سوزلاوچیسی نورالحق خالقی‌نینگ سلام‌وطندارگه ایتیشیچه، کمیده 1000 یاردمچی کوچ و حربی تیک اوچرلری طالب‌لرنینگ هجومی‌نی آرقه‌گه اوروش اوچون فراه شهریگه یوباریلگن و قوراللی طالب‌لرنی قمراوگه آلگن. فراه ده حربی کوچلر سوزلاوچیسی‌نینگ ایتیشیچه، بو آتیشمه‌ده حاضرگچه 8 طالب هلاک و باشقه 8 ته‌سی یره‌لنگن، بیراق امنیتی کوچلردن یالغیز 5 ته‌سی یره‌لنگن.
باشقه تاماندن، فراه دن محلی بیر منبع‌نینگ سلام‌وطندارگه ایتیشیچه، حاضرگچه نیچه تیک اوچردن باشقه بو ولایت گه یاردمچی کوچ یوباریلمه‌گن.
اوشبو منبع‌نینگ کوپه‌یتیریشیچه، قوراللی طالب‌لر اوزلرینی مذکور ولایت‌نینگ مرکزی قماقخانه‌سی و خوفسیزلیک قومندانلیگی گه ییتکزیش اوچون سعی و حرکت قیله‌دیلر و حاضر فراه ولایت حاکمی‌نینگ دفتری‌نی بیر کیلومترلیگی‌ده جایلشگن‌لر. مذکور منبع گه کوره، قوراللی طالب‌لر نظارت گه آلگن منطقه‌لرده چیک پاینت ایجاد قیلیب و اهالی‌نینگ کیم‌لیک‌لرینی تیکشیره‌دی.
بیراق، سلام‌وطندارگه صحبت بیرگن فراه ولایت کینگشی اعضاسی جمیله امینی‌نینگ ایتیشیچه، حاضر قوراللی طالب‌لر فراه مرکزی قماقخانه‌سینی بیر کیلومترلیگی‌ده ییتیشگن و ایلگری بارماقده. خانم امینی گه کوره، طالب‌لرنینگ هجومی آرقه‌گه اوریلیشی اوچون کوپینچه یاردمچی کوچ لازم.
بونگه قوشیمچه، سلام‌وطندارگه صحبت بیرگن فراه ولایت کینگشی باشلیغی فرید بختاورنینگ ایتیشیچه، قوراللی طالب‌لر فراه شهری‌نینگ عسکرآباد منطقه‌سیده هم بیر خودکش هجوم اویوشتیرگن و نتیجه‌ده امنیتی کوچلردن 18 ته‌سی هلاک ایتیلگن.
عین حالده، قوراللی طالب‌لر بیر خبرنامه ترقه‌تیب فراه شهری‌نینگ ایریم بولیم‌لرینی نظارت گه آلگنینی ایتگن.
