مملکت غربیده امنیتی رسمیلرنینگ ایتیشیچه، فراه ولایتیده امنیتی کوچلر تامانیدن طالبلرگه قرشی اویوشتیریلگن هجوملرده، مذکور گروهنینگ 136 اعضاسی هلاک ایتیلگن و باشقه 66 اعضاسی یرهلنگن.
بوگون (سهشنبه) فراه محلی رسمیلری بیلن خبری ییغین اوتکزگن مملکت غربیدهگی 207 ظفر قول اردو قومندانی محیالدین غورینینگ ایتیشیچه، مذکور طالبلر، اوتگن کیچه برنگتوت، شورآباد، گنهکام، رج قیشلاقلری، فراهنینگ نوبهار شهری و بکواه تومنیده امنیتی کوچلرنینگ ییر، توپخانهیی و هوایی هجوملری نتیجهسیده هلاک ایتیلیب یرهلنتیریلگن.
جناب غوریگه کوره، هلاک ایتیلگن طالبلر جملهسیدن 65 تهسی شهر اطرافیدهگی قیشلاقلرده و باشقه 71 تهسی بکواه تومنیده اویوشتیریلگن هوایی هجوملر نتیجهسیده هلاک ایتیلگن.
«طالبلرنینگ جسدلریدن آلینگن صورتلر سلاموطندارگه ییتیشگن؛ ژورنالیستیک قانون رعایه ایتیلیشی اوچون ترقهتیشدن وازکیچدیک»
207 ظفر قول اردو قومندانینینگ ایتیشیچه، امنیتی کوچلرنینگ حربی عملیاتی نتیجهسیده، فراه شهرینینگ اطرافیدهگی برنگتوت و شورآباد قیشلاقلری طالبلردن تازهلنگن و امنیتی کوچلر باشقه قیشلاقلرگه تامان آلغه بارماقدهلر.
جناب غورینینگ کوپهیتیریشیچه، اوشبو حربی عملیات نتیجهسیده بکواه تومنیده طالبلرنینگ نیچه موتری و 5 مخدره ماده ایشلب چیقارهدیگن ایشخانه بوزیلگن. اونینگ ایتیشیچه، بو عملیاتده امنیتی کوچلر و تینچ اهالیگه زیان ییتمهگن.
طالبلر حاضرگچه بو توغریده هیچ نرسه دیمهگن.