فاریاب ولایتی یشاووچیلرینینگ ایتیشلریچه، محلی پولیس قوماندانی اهالینی کلتکلب اولردن ییگولیک آذوق آوقت همده امنیتی قرارگاه تامین لهنیشی اوچون خرجت سورهگن.
اهالیگه کوره، ایکّی معما اورتهسیده قالگنلر. بیر تاماندن محلی پولیس قوماندانلری ییگولیک آذوق آوقت سورهیدی ایکینچی تاماندن ایسه قوراللی طالبلر پولیسگه همکارلیک قیلمیلر دییه خلقنی اولدیریش بیلن تهدید قیلهدی.
فاریاب ولایتی قیصار ولسواللیگی نینگ ثور، قرایی ودینتاش قیشلاقلرینینگ یشاووچیلریگه کوره، «سخی حکومت» نامی بیلن تَنیلگن «سخی» اوشبو قیشلاقلرنینگ محلی پولیس قوماندانی ایتیب تعین لنگن. او، اهالیدن باج سورهگن. ایتیلیشیچه، اهالی باج بیرمهگن تقدیرده، اولرنی ساووقده جزا بیریب کلتکلیدی.
شکایتلرنی تصدیق لهگن ولایتی کینگش اعضاسی محمدنادر سعیدینینگ ایتیشیچه، بولر اوشبو قومانداننینگ قیلمیشیدن نیچه مرته امنیتی ادارهلر، حکومت و افغانستاندهگی بیرلشگن ملتلر تشکیلاتی کمیشنرلیگی هیاتیگه شکایت قیلگنلر. بیراق، هنوزگچه هم بولرنینگ شکایتیگه ایجابی جواب بیریلمهگن. سعیدینینگ سوزلریگه کوره، حکومتنی اهالیگه نسبتن بی فرق یانداشگنلیگی اهالی حکومتدن نفرت لهنیشگه باعث بولگن.
قوماندان سخی نینگ تیلفون آرقهلی سلام وطندارگه، او، ولایت امنیه قوماندانلیگی بویروغی بیلن اوشبو لوازمگه وظیفه لنتیریلگن. او، اهالیدن قوروق نان، یاقیلغی چوب و ایچیلهدیگن سوودن تشقری باشقه نرسه سورهمه گنلیگینی تصدیقلهگن. اونگه کوره، رسمیلر ایستمهگن حالده، مذکور قیشلاقلرنی ترک قیلهدی. لیکن، سخی قوماندان بو قیشلاقلرنی ترک ایتیشی بیلن منطقه قوراللی طالبلر قولیگه اوتیشیدن خواطر بیلدیرگن.
قوماندانگه کوره، بو قیشلاقلرنینگ اهالی بیر تاماندن قوراللی طالبلرگه اویلریگه کیریشگه رخصت بیرهدی و باشقه تاماندن شکایت قیله دیلر.
ولایت سرپرستینینگ سوزلاووچیسی احمدجاوید بیدارنینگ معلوم قیلیشیچه، اوشبو شکایت تیکشیریلیشی اوچون ولایت رسمیلریدن عبارت محلگه هیات جونهتیلگن. مذکور شکایتلر تصدیقلنگن حالده، واقعه عامللری قانونگه تاپشیریلهدیلر.
مذکور قیشلاقلرنینگ اهالیسیگه کوره، فقط دینتاش قیشلاغیده بوندن آلدین 350 خانه دان حیات کیچیرردی، اما، نابرقرارلیکلر همده محل رسمیلری تامانیدن بوندهی نامناسب یاندهشیلیشی سبب هلی فقط 50 عیاله بو قیشلاقده یشیدی.
اوشبو قیشلاقلرنینگ اهالیسی حکومتدن اوز باشیمچهلیکلر آلدی آلینیشینی سورهگنلر.
