اوتگن کون فاریاب مدنی جامعه فعاللری، اوزبیک تیلی چیتله‌نیشیب کیتیشی باره‌سیده «اوزبیک تیلی اوز اوییده بیگانه» ناملی ییغین اوتکزیشلری بیلن دولت‌دن مذکور تیل قول‌له‌نیب، یوکسه‌لیشی اوچون انیق فرهنگی سیاست‌نی ایزله‌شینی سوره‌دیلر.
اوزبیک تیلی یوکسه‌لیشی و رسمی تیل حیثی‌ده تانیلیشی، فاریاب مدنی جامعه فعاللری‌نینگ اسیاسی ایستک‌لریدن دیر. اولرگه کوره، اولکه اساسی قانون 16- ماده‌سیده ( پشتو، دری، اوزبیکی، ترکمنی، پشه‌یی، نورستانی، بلوچی، پامیری وباشقه تیل‌لرده کوپچی‌لیک سوزلشه‌دیگن منطقه‌لرده، پشتو و دری تیللری یانیده اوزبیک تیلی اوچینچی تیل حیثی‌ده رسمی بولیب، اونینگ یوکسلتیریلیشی اوچون قانون آرقه‌لی منتظم بوله‌دی.) دیب کیلگن.
شونینگ‌دیک اولکه اساسی قانونی 43- ماده‌سیده افغان اهالیسی‌گه تیکین شکلی‌ده دولتی بیلیم یورتلرده لیسانس درجه‌سیگه قدر اورگه‌تیش و اورگه‌نیش حقی بیریلگن، باید بو حق؛ دولت تامانیدن تأمین ایتیلسین دییلگن. دولت اورگه‌تیش و اورگه‌نیش باره‌سیده اورته‌لیک شکلی‌ده موثر برنامه‌لر لایحه‌سینی تطبیق ایتیلیش زمینه‌سینی یره‌تیب و منطقه لرده‌گی سوزله شیله‌دیگن آنه تیللرینی اورگه‌تیشگه زمینه یره‌تسین دییلگن.
اوشبو خبری اولتیریشده، فاریاب مدنی جامعه فعاللریدن احمد جاوید کیوان‌نینگ بیلدیریشیچه، ملی رادیو تیلویزیون و فاریاب جریده‌سی نینگ برنامه‌لریدن 50 فایزی اوزبیک تیلی‌ده بولیشی ایتیله‌دی.
فاریاب مدنی جامعه فعاللری‌نینگ قطع‌نامه سیده ولایت دولتی اداره‌لری‌نینگ لوحه‌لریدن 70 فایزی اوزبیک تیلی‌گه بولسین دیب کیلگن. شونینگ‌دیک بولر، اولکه درسی نظامی‌گه اوزگریش کیلیشی‌نی ایسته‌گنلر و بیرینچی صنف‌دن تا 9- صنف‌گه قدر اوقیته‌دیگن کتابلر عمومأ اوزبیک تیلی‌گه ترقه‌تیلیب، اوقیتوچی‌لری لیسان درجه‌سیگه بولیب اوزبیک ادبیاتی‌دن تحصیل کوریب چیقگن‌لرنی مکتب‌لرده اورگه‌تیش اوچون ایشگه آلینیشی اورغولنگن.
فاریاب مدنی جامعه فعاللری دولت رسمی‌لرگه قره‌تیب، اولر ایسته‌گی‌گه جدی شکلی‌ده توجه بولمه‌گن صورتده، دولتی احتفال و اولتیریشلرنی تحریم قیله‌میز دیب هشدار بیرگنلر.
