اوییده کوپراق افسون آتیده چقیریلهدیگن 17 یاشر مدینه، اوتگن کیچه خودکشلیک قیلگن. مدینهنینگ قرینداشلریگه کوره، او هر کیچه دهگی دیک دسترخاننی اوستیده حاضر بولیب و ایستهگن تلویزیونی دستورلرینی کوریب اویقولهیدیگن اتاقیگه کیتگن، بیراق ایرته آغزی و بورنیدن قان کیلگن جسدینی تاپگنلر.
افسوننینگ قرینداشلریدن بیری آتی فاش ایتیلمسلیک شرطیده سلاموطندار بیلن اوتکزگن صحبتیده، افسون بیر یاش ییگیتگه علاقهدار بولگنی باعث، خودکشلیک قیلگنینی ایتگن. منبعگه کوره، افسون بیر یاش ییگیتگه عاشق بولیب و او ییگیت بیلن علاقه قورگن ایکن. بیراق، آتهسی بو ایکاوینینگ تورموش قوریشیگه قرشیلیک کورستگن. منبعنینگ کوپهیتیریشیچه، افسون سیچقان اولدیرهدیگن دارودن فایدهلنیب خودکشلیک قیلگن.
اوشبو واقعه فاریاب ولایتینینگ مرکزی میمنه شهری خواجهآباد منطقهسیده یوز بیرگن.
فاریاب امنیه قومندانلیگی وقتینچهلیک باشلیغی و جنایی جرملرگه قرشی کورهش مدیری جنرال محمد نادرنینگ ایتیشیچه، میمنه شهریده افغانکوت لیسهسینینگ اوقووچیسی مدینه، یاتگن جاییده جان بیرگن. جناب نادریگه کوره، قیزنینگ جسدی قانونی طبیاتگه آلیب باریلگن و تیکشیروو هم باشلنگن.
شونینگدیک، افسوننینگ آتهسی همایوننی ایتیشیچه، افسوننینگ حرکتیگه هیچ بیر اوزگریش کیلمهگن ایکن و هر کیچهدهگی دیک اویقولهیدیگن اتاقیگه کیتگن. افسوننینگ آتهسینی ایتیشیچه، ایرته ساعت 10 اطرافیده چایگه تورغیزگنی بارگنلریده جسدینی تاپگنلر.