فاریاب امنیتی رسمی‌لری‌نینگ ایتیشیچه، نماینده‌لر کینگشی اعضاسی فتح‌الله قیصاری‌گه تیگیشلی محلی پولیس بیر معامله نتیجه‌سیده، قیصار تومنی‌ده تورت قیشلاق‌نی طالب‌لرگه ساتگن.
قیصار تومنی‌نینگ امنیه قومندانی نظام‌الدین قیصاری‌نینگ سلام‌وطندارگه ایتیشیچه، نماینده‌لر کینگشی‌نینگ اعضاسی فتح‌الله قیصاری‌گه تیگیشلی هیبت‌الله رهبرلیگی‌ده‌گی محلی پولیس، انچه پیت آلدین، امنیتی کوچلر تامانیدن نظارت‌گه آلینگن تنگی بوره‌غن، آقمس، قرایی و زعفران قیشلاق‌لرینی طالب‌لرگه قوییب یوبارگن.
قیصار امنیه قومندانی‌نینگ ادعاقیلیشیچه، نماینده‌لر کینگشی‌نینگ اوشبو اعضاسی‌گه تیگیشلی محلی پولیس‌لر، باشقه 2 عراده تانک و 5 عراده رنجرنی طالب‌لرگه تاپشیرگن.
بیراق، نماینده‌لر کینگشی‌ده فاریاب خلقی‌نینگ نماینده‌سی فتح‌الله قیصاری، قیصار امنیه قومندانی‌نینگ بو ادعاسی‌نی رد قیلیب ایتیشیچه، مذکور تومن‌ده هیچ بیر محلی پولیسی یوق و بولگن صورتده، قورال‌لرینی دولت‌گه تاپشیره‌دی.
نماینده‌لر کینگشی‌نینگ اوشبو اعضاسی، قیصار امنیه قومندانی‌نینگ ادعالرینی شخصی خصومت دیب ایتیشیچه، نظام‌الدین قیصاری، انچه مدت‌دن بویان، ناقانونی شکلده قیصار امنیه قومندانی بولیب یورگن.
جناب فتح‌الله قیصاری‌نینگ ادعا قیلیشیچه، مذکور تومن مرکزی‌دن باشقه قیصارنینگ 360 قیشلاغی قورال‌لی طالب‌لرنینگ نظارتی‌ده بولگن.
بیراق، قیصار امنیه قومندانی‌نینگ ایتیشیچه، جاری هفته باشلنگنی‌دن بویان، غور، بادغیس ولایت‌لری و فاریاب ولایتی‌نینگ باشقه تومن‌لرینی طالب‌لری، قیصارنی تصرف ایتیش اوچون، مذکور تومن‌گه کیلگن‌لر و حاضر زعفران بیلن ارکلیک قیشلاق‌لریده امنیتی کوچلر بیلن طالب‌لرنینگ اورته‌سیده توقنه‌شوو دوام ایتماقده.
