فاریاب ولایتینینگ شیرینتگاب تومنی محلی رسمیلری، اوشبو ولایت بیلیم یورتی اوقووچیلریدن بیرینینگ باشی طالبلر تامانیدن کیسیلگنیدن خبر بیرگنلر.
شیرینتگاب تومنی حاکمی سیدلقمان گهریکنینگ سلاموطندارگه ایتیشیچه، مذکور خیرمحمد ناملی اوقووچی سمنگان ولایتینینگ اصلی یشاوچیلریدن ایکن و بیلیم یورت تعطیلینی اوتکزگنیدن کیین، اوتگن کون (یکشنبه) کیچ قورون فاریاب کیلهیاتگن بیرچاغده، طالبلر موتردن توشیریب اوزلری بیلن بیرگه آلیب کیتگن.
شیرینتگاب تومنینینگ حاکمیگه کوره، بوگون (دوشنبه) ایرتهلب قوراللی طالبلر، اوشبو اوقووچینینگ باشی کیسیلگن جسدینی فیض آباد دشتیده یول چیکهسیده تشلهیدی و امنیتی کوچلر جسدنی تاپیب میمنه شهری کسلخانهسیگه آلیب کیلهدی.
فاریاب بیلیم یورتی رسمیلرینینگ ایتیشیچه، خیرمحمد اوشبو بیلیم یورتنینگ ایکینچیلیک بولیمی اوچینچی صنف اوقووچیسی ایکن.
شیرینتگاب تومنیدن کیلگن باشقه بیر خبرگه کوره، مذکور تومن مرکزیگه بیر هاوان اوقی توشگنی نتیجهسیده، تورت تینچ اهالی یرهلنگن.
شیرینتگاب ولسوالیگه کوره، بو اوق طالبلر تامانیدن آتیلگن و یرهلنگنلرگه بیر کیچیک قیز هم شامل بولگن.
اونگه کوره، اوشبو واقعه یرهدارلری، میمنه شهری کسلخانهسیگه انتقال بیریلگن و اولرنینگ ساغلیک وضعیتی یخشی بولماقده.