د کورونا ویروس له خپرېدو سره هممهاله په غور ولایت کې د طالبانو او امنیتي ځواکونو ترمنځ د نښتو په دوام د فېروزکوه ښار له لوېدیځو او شمال لوېدیځو سیمو نه سلګونه کورنۍ بېځایه شوې دي.
د غور د ولایتي شورا غړی عبدالحمید ناطقي سلاموطندار ته ویلي، طالبانو د غور ـ هرات لویې لارې له نیولو وروسته د فېروزکوه ښار پر لوېدیځو او شمال لوېدیځو سیمو خپلو بریدونو ته زور ورکړی چې له کبله یې څه باندې ۲ سوه کورنۍ له خپلو سیمو بې ځایه شوې دي.
د غور مدني فعالان محمدحسن حکیمي او محمدوزیر نوراني هم په دغه ولایت کې د سلګونو کورنیو بېځایه کېدل د اندېښنې وړ بولي او خبرداری ورکوي، که دغو کورنیو ته ژرترژره لاسرسی ونه شي، انساني ناورین به رامنځته شي.
د دوی په وینا، اوس چې کورونا ویروس په خپرېدو دی، که د دغو بېځایه شویو کورنیو غم و نه خوړل شي، لرې نه ده چې ګڼشمېر یې پر دغه ویروس اخته شي.
د غور د والي ویاند محمدعارف عابر وايي، له ځینو دغو کورنیو سره مرسته شوې او هڅه کوي د نظامي عملیاتو په کولو سره د فېروزکوه ښار لوېدیځې سیمې له وسلهوالو پاکې کړي، څو خلک بېرته خپلو کورونو ته ستانه شي.
د ځايي مسوولانو او په ولایتي شورا کې د غور د خلکو د استازو په وینا، طالبانو د نښتو په دوام «کمنج» پول چې د غور ـ هرات په لویه لاره کې دی، هم وران کړی او خلک یې له ډېرو ستونزو سره مخ کړي دي.
