غور ولایتی نینگ معارف اداره‌سی مسووللری، اوقیتووچی لوازمی آزلیگی و مسلکی اوقیتووچیلر بولمه‌گن لیگی باعث 1395- تعلیمی ییلده اوقووچیلر درست درس اوقیه آلمه‌گن لیکلری حقیده تشویش بیلدیرگنلر.
سلام‌وطندار رادیوسی بیلن مخصوص صحبت اوتکزگن معارف ریاستی نینگ باشلیغی صبغت‌الله اکبری، قویاش 1395- تعلیمی ییلده 2500 اوقیتووچی‌گه احتیاجلری بولگن و بو رقم ایسه 1396- ییلده 3000 گه ییتگن دیدی. غور معارف ریاستی نینگ باشلیغی، آیلیک آزلیگی و حکومت نینگ دییرلی اعتبار قره‌تمه‌گن لیگی سبب ساحه نینگ متخصصلری اوقیتووچیلیک قیلیشنی تنلمه‌یدلر دیگن.
شونینگدیک غور ولایتی کینگشی نینگ اعضاسی حمیدالله متحد، نابرقرارلیکلر یانیده ملکه‌لی استادلر بولمه‌گن لیگی ولایتده تعلیم وتربیه صفتی قویی توشیشی‌گه سبب بولگن لیگینی بیلدیرگن.
اونینگ آگاهلنتیریشیچه، حکومت غور خلقی نینگ بو معماسیگه حل یول تاپمه‌گن حالده، اوقووچیلر درس و تعلیم دن وازکیچه‌دیلر.
غور ولایتی کینگشی نینگ ینه بیر اعضاسی عبدالحمید ناطقی، ولایتده‌گی معلملرنینگ مسلکی ایمس‌لیگینی تنقید آستیگه آلیب، غورنینگ مکتبلرده اوقیتووچیلیک قیله‌دیگنلرنینگ کته قسمی 12 یا- ده 14 – صنفنی بیترگنلردن عبارت دیدی.
حاضر غور ولایتیده 884 باشلنغیچ، اورته و لیسه مکتبلر فعالیت قیله‌دی. بو مکتبلرده 220 مینگ اوقووچی درس بیلن شغللنه‌دی. بولرنینگ 40%نی قیزلر تشکیل بیریشی ولایت معارف رسمیلر تامانیدن تیلگه آلیندی.
