غور ولایتی‌ده ایکی ناقانونی قورال‌لی قومندان اورته‌سیده یوزبیرگن اوچ کون‌لیک توقنه‌شوو نتیجه‌سیده، 5 قورال‌لی هلاک بولیب و باشقه 7 ته‌سی یره‌لنگن. ایتیلیشیچه، اوشبو توقنه‌شووده، بیر تینچ اهالی هلاک بولگن و باشقه بیر کیشی یره‌لنگن.
غور ولایتی محلی تانیقلی قومندانلردن ملامصطفی حقانی و حاجی محسن‌خان، انچه ییل‌لردن بویان قومی خصومت‌لری بولگنی باعث، ایریم پیت‌لرده انتقام آلیش اوچون توقنشه‌دیلر.
غور ولایتی‌نینگ شهرک تومنی سرپرستی شاه‌پسند پهلوی‌نینگ سلام‌وطندارگه ایتیشیچه، توقنه شوو بوگون «چهارشنبه» ایرته‌لب ساعت 7 اطرافیده، کمنج، یکه‌سنگ و پای‌کوتل منطقه‌لریده باشله‌نیب و حاضرگچه دوام ایته‌دی. جناب پهلوی‌گه کوره، اوروش تامانلری آغیر و یینگیل قورال‌لردن فایده‌لنه‌دی و حاضرگچه راکت و چیغناق آتیش نتیجه‌سیده، نیچه اوی بوزیلگن.
شهرک تومنی سرپرستی‌نینگ ایتیشیچه، اولر توقنه‌شوو کینگه‌ییشی توغری‌سیده خواطر بیلدیره‌دیلر و غور محلی رسمی‌لری، ایکی گروه اورته‌سیده‌گی اوروش‌نی توخته‌تیش اوچون چاره تدبیر کورمه‌گن تقدیرده، تینچ اهالی مالی و جانی قربانلیگی میزانی آشیشی ممکن.
غور حاکمی سوزلاوچیسی عبدالحی خطیبی‌نینگ ایتیشیچه، اوتگن کون محل‌گه هیأت یوباریلگن، توقنه‌شوولرنی یکونلنتیرگن.
بیراق، محلی رسمی‌لرنینگ ایتیشیچه، ولایت مقامی تامانیدن یوباریلگن هیأت قیتگنی‌دن کیین، ایکی تامان اورته‌سیده قیته‌دن توقنه‌شوو باشلنگن.
غور حاکمی سوزلاوچیسی‌نینگ تأیید قیلیشیچه، اوشبو توقنه‌شوولرده ایکی تاماندن 5 کیشی هلاک بولگن و باشقه 5 کیشی یره‌لنگن.
