کابل-قندهار قتناو یولی توسیلگنیدن 4 کون اوتماقده و نتیجهده مینگلرچه یولاوچی و یوک تاشیووچی موتر ایکی تامانده بند قالگن. وجودگه کیلگن وضعیت غزنی یشاوچیلرینی خواطرگه سالگن، بازارلر و دکانلر یاپیلگن و شهر یریم تعطیل حالتینی اوزیگه آلگن.
عادی کونلرگه نسبَتن شهرده حربی عسکرلر حضوری آرتیق کورینهدی. غزنی یشاوچیلری، مرکزی حکومتدن بو قیینچیلیک سوزلشوولر ارا حل ایتیلیشینی سورهیدی.
محلی حکومتنینگ ایتیشیچه، غزنی پولیس قومندانی جنرال محمدزمان ریاستیگه حقیقتنی تیکشیرووچی بیر هیأت قرهباغ تومنیگه یوباریلگن. غزنی پولیس قومندانی گه کوره، بو هیأت واقعهنی ریجهلگن کیشیلرنی تانیب آلگن.
شونینگدیک، غزنی حاکمی مطبوعات دفتری مسؤوللرینینگ ایتیشیچه، قرهباغ واقعهلری تیکشیریلیشی اوچون کابلدن جونهتیلگن هیأت غزنی گه ییتیشگن و تیکشیروولرینی باشلهگن؛ بیراق اعتراضچیلرنینگ ایتیشیچه، دولت اولرنینگ ایستکلرینی قبول قیلگونگهقدر، اعتراضلریگه دوام بیرهدی.
اعتراضچیلرگه کوره، پلحیدرآباد منطقهسیده اولرنینگ دادخواهلیک خیمهلریدن بیری پولیس تامانیدن اوتگه یاندیریلگن و شونینگدیک، اعتراضچیلردن 3 تهسی کلتکلنگن.
اوشبو اعتراضلر، شیرآباد قیشلاغینینگ اهالیسی، محلی پولیس کییمیده بولگن کیشیلر، مذکور قیشلاققه هجوم اویوشتیریب، ایکی کیشینی اولدیریب و باشقه 2 کیشینی اوزلری بیلن آلیب کیتگنینی ادعا قیلگنیدن سونگ، اوج آلگن. ایتیلیشیچه، بو قیینچیلیک شیرآباد و نیخته قیشلاقلری آرهسیده سوو اوستیگه بولگن جنجللردن وجودگه کیلگن.
