"جري جوک ته او جوک مې هدف ته برابروه او ډز چپه يې کړه، په پنځوو دقیقو کې مې شپږ ځانمرګي وغځول"
دا د عیسی خان لغماني جملې وې، چې د پارلمان پر ودانۍ د نننۍ ځانمرګي بريد کوونکو له بريد ځوابولو وروسته له رسنيو سره وکړې.
هغه وايي، چې له یوې زوروې چاودنې وروسته يې د زیات ګردونو له لاسه خپله وسله ورکه کړه؛ وروسته يې برید کوونکو ته د پارلمان لومړي عمومي دروازې په سيميټي موانعو کې کمين ونیوه او د ملي اردو له لوري ورکړل شوي ټوپک په زور يې ۶ واړه ځانمرګي بريدګر يې په خورا اسانۍ سره د مرګ کومې ته ورسول.
د ملي اردو دغه سرباز، د پارلمان د ودانۍ امنيتي ځواکونو له ډلې و.
هغه هرڅه، چې يې کړي په خورا لوړ اواز پرې فخر کوي او وايي، " زه د وطن خدمتګار یم او والله که د پاکستان یو غلام هم رانه کامیاب شي."
د ځانمرګو بريدګرو جسدونه په مېدان پراته وو او مخکې له دې، چې خپل لاسي بمونو ته چاودنه ورکړي له منځه تللي دي.
په خواله رسنيو کې ډيری د همدغه سرباز د شجاعت او سرښندنې په اړه تبصرې روانې دي او یو شمېر ځوانان خپله پاڼه کې د ده عکس پورته کړی.
عيسی خان لغمانی هغه څوک دی، چې شاید د ده مېړانه نه وای، نو په پارلمان کې محشر جوړېده.
ده ويلي، چې په پنځوو دقیقو کې ټول ځانمرګي بريدګر يې وژلي او وروسته ډزې د امنيتي ځواکونو له لورې پېل شوې.
ټا کل شوې وه، چې نن به د ولسي جرګې عمومي غونډې ته د ولسمشر دويم مرستیال سروردانش له خوا د ملي دفاع وزارت ته نوماند معصوم ستانکزی وروپیژندل شي، خوکله چې د ولسي جرګې رییس وویل، میلیمانه دې د غونډې تالار ته ور وبلل شي د سترې چاودنې غږ راپورته شو.
بیا نورې ډزې هم وشوې او ټول وکیلان او د شورا کارکونکي او پارلماني خبریالان له ځانګړې لارې د شورا له انګړ څخه روغ رمټ و ویستل شول.
د دې جرګی د کورني امنیت د کمېسیون غړي لالي حمیدزي وویل، چې دا د پردۍ جګړې یوه برخه ده چې پر افغانانو تپل شوې.
لالي وویل، چې د ملي شورا په ودانۍ لومړی درنه چاودنه وشوه او بیا د ار پي جي راکیتونه وتوغول شول، خو د پارلمان وکیلانو ته یې مرګ ژوبله نه ده اړولې.
د نوموړي په وينا په پارلمان کې دننه کوم وکیل ته زیان نه دی اوښتی او یواځې دوه امنیتي کسان ټپيان شوي دي او اوسمهال د درملنې له پاره روغتون ته استول شوي.
په همدې حال کې د کابل امنیې قوماندان عبدالرحمان رحیمي وویل، چې له چاودېدونکو توکو ډک موټر ته د ملي شورا دیوال سره نږړې چاودنه ورکړه، بریدګرو غوښتل له چاودنې وروسته د ملي شورا ودانۍ ته ننوځي، چې د امنیتي ساتونکو له خوا په نښه او هدف ته له رسېدو وړاندې له پښو وغورځول شول.
هغه هم وايي، چې د بريدګرو شمېرو شپږو تنو ته رسېده.
د پارلمان په انګړکې یو وسله تون هم د ډزو او چاودنوپه پایله کې اوراخیستی وو او ترډیره د ډزو غږونه اوریدل کیدل.
