هر ییلی ینگی کوکلم فصلی ییتیب کیلیشی بیلن افغانستان بویلب عمومی یوللرده نا برقرارلیک آشیب، کوپچیلیک یولاووچیلر شامل حربی عسکرلر حیاتیگه ضامن بولهدی.
ایچکی ایشلر وزیرلیگی سوزلاووچیسینینگ اورین باسری نجیب دانشنینگ سلام وطندارگه بیلدیریشیچه، بو ییل افغانستان عمومی قتناو یوللری امنیتی تامین ایتیلیشی اوچون سکیزمینگ پولیس عسکری ایشگه سالینهدی. پولیسنینگ اوشبو عسکرلری ملی اردو همکارلیگی بیلن عمومی یوللر خوفسیزلیگینی تامینلش اوچون ایش قیلیشلری ایتیلهدی.
جنابدانش، مملکتدهگی نا برقرار عمومی یوللردن بیری کابل – قندهار یولی بولگن لیگینی ایتگن. ایچکی ایشلر زویرلیگی اوشبو یول خوفسیزلیگی تامین ایتیلیشی اوچون جدی تدبیر آلگن دیدی دانش.
عین حالده، حربی ایش بیلرمان عتیقالله امرخیلنینگ سلام وطندارگه گپیریشیچه، عمومی یوللر امنیتی تامین ایتیلیشی اوچون ملی مدافعه وزیرلیگینینگ دییرلی اعتبار قرتمهگن لیگی و تشقی قوللرنی ایشلهشی عمومی یوللر خوفسیزلیگی بوزیلیشی اوچون بیرینچی عامل دیر. باشقه تاماندن تینچلیک مذاکرهلری افغانستان نا برقرار ایتیلیشی اوچون اساسی نقشی بار، هر گروه بیر منطقهنی نابرقرار قیلیش بیلن تینچلیک مذاکرهلرینی اوز منفعتیگه سوءاستعمال قیلماقچی بولهدی دیدی امرخیل.
امرخیلگه کوره، مرکزی دولت ینه هم عمومی یوللر امنیتی تامین ایتیلیشی اوچون بی فرق یاندشگن حالده، وضعیت بوندن هم کوپراق یامان بولیشی امکاندن ییراق ایمس. مملکت عمومی یوللرده یولاووچیلر انده – سنده دولت قوراللی مخالفلری آرقهلی تورلی کییملرده کورینب هجوم توتیلیب اولدیریله دیلر.
شونینگدیک امرخیل افغانستان نابرقرار ایتیلیشی اوچون پاکستان نینگ تاثیر یوقلیگینی هم رد ایتمیدی.
مملکت عمومی یوللری خوفسیزلیگی یامان لشگنلیگی توغریسیده خواطر بیلدیرگن نمایندهلر مجلسینینگ اعضاسی نظیفهذکی سوزلریگه کوره، ملی کوچلر اوز ایش لرینی بجریش اوچون تفاوتسیزلر. اونگه کوره، افغانستان بویلب عمومی یوللرده یولاووچیلر امنیتی تامین قیلینیشی اوچون مملکت ملی مدافعه همده ایچکی ایشلر زویرلیگی کیچه – کندوز ایش قیلیشیگه توغری کیلهدی.
مملکت بویلب عمومی قتناو یوللرینینگ نا برقرارلیگی اهالینینگ جدی تشویشلریگه سبب بولگن. بوندن نیچه کون آلدین تینچ اهالیدن عبارت اون اوچ کیشی یولاووچی کابل – غزنی عمومی یولیده آق لباسده بولگن نا معلوم قوراللی شخصلر تامانیدن آتیب اولدیریلگندی. شونینگدیک بیر آی آلدین کابل- قندهار یولیده اوغیرلگن 31 هزارهنینگ تقدیری بارهسیده هنوزگچه انیق معلومات قولده ایمس.
