د حکومت اجرایوي مشر ډاکټر عبدالله عبدالله وايي، چې د نظام د بدلون په اړه باید لویه جرګه دایره شي او په دغه جرګه کې، چې هر ډول پریکړه وشوه، نو دوی ته به د منلو وړ وي.
نوموړي په هغې غونډه کې چې د دلوې۲۶ مې نیټې په ویاړ کابل کې د حراست او ثبات شورا او د جهادي حزبونود عالي شورا لهخوا د مجاهدینو په ملاتړ جوړه شوې وه زیاته کړه، چې دوی په افغانستان کې د نظام د بدلون پلوي کوي او باید ریاستي نظام په پارلماني بدل شي.
همدارنګه ډاکټر عبدالله زیاته کړه، چې د شوروي په وړاندې د افغانستان د خلکو جهاد د ستایلو وړ دی او په اوس وخت کې دا چې امنیتي سرتیري له هیواد څخه دفاع کوي جهادي کسان بلل کېدای شي.
عبدالله وویل، چې دولت باید نیوکه منونکې و اوسي او پری نهږدي چې د هیواد دښمنان له کورنیو نیمګړتیاوو ګټه واخلي.
عبدالله زیاتوي، چې د ملي وحدت د شتون پانګه د دوی ژمنې دي چې باید یې پلي کړي او دوی د خپلو ژمنو د پوره کولو لهپاره خپلو هڅو ته دوام ورکوي.
له بل لوري بیا، غونډې ته د نوې جبهې مشر انوار الحق احدي په اوسني نظام نیوکه وکړه او وې ویل، چې اوسنی نظام قانوني مشروعیت نهلري، ځکه چې حکومت د خپلو ژمنو په پلي کولو کې پاتې راغلی دی.
احدي وویل، چې په هیواد کې اوسنې نظام بد نهدی، بلکې ناسم مدیریت د دې لامل شوی، چې نظام یې د نیوکو لاندې راوستی دی.
په غونډه کې د حراست او ثبات مشر عبدالرب رسول سیاف وویل، چې حکومت باید د هیواد اوسني وضیعت ته ډیره پاملرنه وکړي او د هیواد ګاونډیان باید د افغانستان له بربادۍ لاس واخلي ځکه چې د افغانستان بربادي د ټولې اسیا بربادي ده.
سیاف وایي، چې دوی د اوسني نظام د له منځه وړلو غوښتونکي نهدي او اوسنی نیمګړی نظام هم په بې نظامۍ غوره وبلله.
سیاف زیاتوي، چې په اوس وخت کې د افغانستان خلک ټول په یوه کښتې کې سپاره دي که دا کښتې ډوبه شي، نو یواځې لاملین یې نه، بلکې ټول ولس پکې ډوبیږي.
همدارنګه په غونډه کې د پخواني ولسمشر مرستیال محمد یونس قانوني وویل، چې حکومت باید په اداراتو کې د اصلاحاتو د راوستلو ترڅنګ د ټاکنو پروسه کې روڼوالی رامنځ ته کړي، ترڅو پر حکومت د خلکو باور بېرته را ژوندی شي.
غونډې ته راغلو یوشمیر سیاسي او جهادي شخصیتونو د افغانستان د خلکو قربانۍ وستایلې او له حکومته یې وغوښتل، چې باید د هیواد د ابادۍ لهپاره خپلې ټولې هڅې وکړي.