ملی بیرلیک حکومتی نینگ اجرایی باشلیغی عبدالله عبدالله نینگ تینچلیک سوزلشوولرده اشاره قیلیب ایتیشیچه، تینچلیک تامین ایتیلیشی خصوصیده بولگن فرصت قولدن کیتی و طالبان گروهی تینچلیک سوزلشوولرده «ناتوغری محاسبه» ایتیلدی.
عبدالله عبدالله، مملکت ملی قهرمانی شهید احمدشاه مسعود و شهید هفته‌سی مناسبتی بیلن قورولتایی خیمه‌سیده صحبت قیله‌ریدی. اونینگ ایتیشیچه، «حاضرده تینچلیک‌دن فاصله آلگن‌میز.»
جناب عبدالله تینچلیک تامین ایتیلیشی خصوصیده سونگی سعی و حرکت‌لرنی بیر فرصت عنوان قیلگن. اونینگ ایتیشیچه، سونگی حرکت‌لرنی «تینچلیک تامین ایتیلیشی و تینچلیک‌که قول تاپیش اوچون بیرفرصت بولیشی ممکن ایدی و بو فرصت هم قولدن کیتی.» جناب عبدالله گه کوره، اوروش هیچ‌کیم نینگ منفعتی‌گه ایمس و تاریخ‌گه قره‌گنده تینچلیک‌که قول تاپیش اوچون کوپینچه قربان بیریلگن.»
ملی بیرلیک حکومتی نینگ اجرایی باشلیغی‌گه کوره، بیرلیک و بیرپارچه‌لیک بولمه‌گن صورتده، مملکت‌ده بولگن قیین‌چیلیک‌لردن چیقیش امکانی یوق دیر.
جناب عبدالله، مملکت ملی قهرمانی احمدشاه مسعود نینگ قیلگن ایش‌لریدن ستایش قیلیب ایتیشیچه، مملکت ملی قهربانی بیرلیک و بیرپارچه‌لیک اوچون سعی و حرکت قیلگن و تینچلیک تامین ایتیلیشی اوچون کوره‌شگن دیر.
سابق مجاهدلر قومندانی احمدشاه مسعود 18 ییل آلدین میلادی 2001- ییل سپتمبر آی نینگ 9- تاریخیده اوزینی خبرچی تانیتگن ایکی انتحارچی کیشی تامانیدن اولدیریلدی.
ملی بیرلیک حکومتی باشلیغی نینگ مملکت ملی قهرمانی و شهید هفته‌سیدن نشانلش طریقی دن تنقید قیلیب ایتیشیچه، شهر ایچیده اهالینی اذیت قیلیش و اوق آتیش مملکت ملی قهرمانی احمدشاه مسعود نینگ روشیدن ایمس دیر. جناب عبدالله، بو حرکت‌لردن قول تارتیلیشیدن امیدوارلیک بیلدیرگن.
ایتیلیشیچه، بوگون "دوشنبه" کابل گارنیزیونی عسکرلریدن بیری مسعود نینگ طرفدارلری تامانیدن اولدیریلدی.
ملی مدافعه وزیرلیگی نینگ سوزلاوچیسی روح‌الله احمدزی بوگون "دوشنبه" ایرته‌دن چاغیده کابل شهری نینگ ترافیک تورت یولیده امنیتی کوچلردن بیری نینگ ناقانونی قورالی کیشی‌لر تامانیدن اولدیریلگنیدن خبر بیرگن.
اونینگ ایتیشیچه، گارنیزیون قومندانلیگی نینگ ایکینچی تولی بریدملی محمد نور مذکور منطقه‌ده امنیت‌نی تامین قیلیش اوچون جای‌لشگن ایدی، بیراق قوراللی عزادارلر تامانیدن اوققه توتیلگن.
کابل گارنیزیونی نینگ اعلان قیلیشیچه، بو توغریده 6 کیشی قولگه آلینگن و اهالینی اذیت قیله‌دیگن 30 عراده موتر توخته‌تیلگن.
