طالب‌لر قیته‌دن قندوز ولایتی سه‌درک، خاک‌کنی، جادۀ آزادی، امام صاحب بندری، بالاحصار ینگی سرکی و خان‌آباد بندری اوستیگه هجوم اویوشتیریب و بو منطقه‌لرنی باسیب آلگن. سلام‌وطندار خبرچیسی قندوز یشاوچیلریدن نقل قیلیب، امنیتی کوچلر بیلن قورال‌لی طالب‌لر اورته‌سیده یوزبیرگن توقنه‌شوو قندوز چوکی یقینیده نیچه ساعت دوام تارتگنینی ایتکن.
حاضرگچه اوشبو توقنه‌شوولر قربانلیگی توغری‌سیده معلومات قولگه کیریتیلمه‌گن.
خلق منبع‌لری‌نینگ سلام‌وطندارگه ایتیشیچه، طالب‌لر (دوشنبه کون) کیچ قورون، اوشبو منطقه اوستیگه هجوم اویوشتیرگن و نیچه ساعت توقنه‌شوودن کیین، منطقه طالب‌لر نظارتی‌گه اوتگن.
شونینگ‌دیک، طالب‌لر اوتکن هفته اوچ تاماندن مذکور ولایت اوستیگه هجوم اویوشتیریب و نتیجه‌ده شهر مرکزی‌نی باسیب آلیب اوچ کونگچه سقله‌گن ایدی. بیراق امنیتی رسمی‌لر، تازه‌لش عملیات‌لر یولگه قوییلیب، اوشبو ولایت بوتونله‌ی طالب‌لردن تازه‌لنگنینی ایتکن.
انه شونده‌ی، قندوز پولیس قومندانی محمد قسیم جنگل‌باغ‌گه کوره، شهر وضعیتی عادی حالتی‌گه قیتگن و خلق کونده‌لیک ایشلری‌گه دوام بیره‌آله‌دی. شونینگ‌دیک، قندوز محلی رسمی‌لری مملکت بیره‌قینی کوتریب، طالب‌لر قیته‌دن قندوز اوستیگه هجوم اویوشتیره‌آلمس‌لیگینی ایتکن ایدی.
خلق ارا کیچریم تشکیلاتی، قندوز شهری اوچ کون طالب‌لر نظارتی‌ده بولگنی توغری‌سیده گزارش ترقه‌تیب ایتیشیچه، مذکور گروه اوچ کون جریانیده، تینچ اهالینی اولدیریش، گروهی شکلده جنسی زورلش و اویلرنی تیکشیریش‌گه قول اورگن. گزارشلرگه کوره، قندوز یشاوچیلری اوشبو ناتینچ لیک‌لر باعث، آذیق آوقت، ایچیم سوو و دارو کم‌لیگی‌گه روپه‌ره بولگن.
عین حالده، تخار ولایتی خواجه‌غار تومنی‌نینگ ولسوالی ملاعمر، یقین آره‌ده طالب‌لر تامانیدن مذکور ولایت اوستیگه هجوم اویوشتیریلیشی‌دن خبر بیره‌دی. اونینگ ایتیشیچه، طالب‌لر خواجه‌غار تومنی اوستیگه هجوم اویوشتیریش خصوصیده سعی و حرکت قیلماقده، بیراق امنیتی کوچلر بو گروه‌گه قرشی کوره‌شیش خصوصیده بوتونله‌ی تیارگرلیک آلگن.
