فاریاب ولایتی قیصار تومنی محل رسمی‌لری‌نینگ ایتیشیچه، طالب‌لر مذکور تومن‌نینگ میرشادی منطقهسیده 25 اوی‌نی یاندیرگن و شونینگ‌دیک بیر آقسال‌نی اولدیرگن.
قیصار تومنی سرپرستی رحمت‌الله قیصاری‌نینگ سلام‌وطندارگه ایتیشیچه،اوتکن دوشنبه کون، جمهور رییس بیرینچی اورین باسری جنرال عبدالرشید دوستم، اوشبو منطقه‌ده یولگه قوییلگن عملیات‌ده حضور تاپکن و طالب‌لر توقنش‌مسدن محل‌نی ترک ایتکن.
جناب قیصاری‌نینگ ایتیشیچه، سه‌شنبه کون کیچ قورون، جناب دوستم منطقه‌نی ترک ایتکنی‌دن کیین، طالب‌لر او ییرگه قیته‌دن کیلیب و اوروش‌دن قاچیب محل‌نی ترک ایتکن خلق اویلرینی اوتکه یاندیرگن.
اونینگ کوپیتیریشیچه، طالب‌لر اوشبو منطقه‌ده جان محمد ناملی بیر قری آدم‌نینگ اوغلی امنیتی کوچلر صفیگه بولگنی باعث، اولدیرگن.
شونینگ‌دیک، بغلان ولایتی کینگش باشلیغی سیدعبدالباقی هاشمی‌نینگ معلوم قیلیشیچه، طالب‌لر خلق اویلرینی اوتکه یاندیرگن.
عین حالده، طالب‌لر سوزلاوچیسی قاری یوسف احمدی‌نینگ بیر پیام آرقه‌لی ایتیشیچه، طالب‌لر جانی باریچه جنرال دوستم‌نینگ نمایشی حرکتی‌گه قرشی کوره‌شه‌دی.
فاریاب‌ده 73 قیشلاق قیته‌دن طالب‌لردن آلیندی
فاریاب ولایتی رسمی‌لری‌نینگ ایتیشیچه، مذکور ولایت‌ده یولگه قوییلگن «قیلیچ 7» عملیاتی نتیجه‌سیده، 73 قیشلاق امنیتی کوچلر قولی‌گه توشگن.
مسوول‌لرگه کوره، اوشبو عملیات‌نی جمهور رییس بیرینچی اورین باسری جنرال عبدالرشید دوستم رهبرلیک قیله‌دی.
فاریاب سرپرستی عبدالستار بارزنینگ سه‌شنبه کون بیر خبری ییغین‌ده ایتیشیچه، «قیلیچ 7» ناملی تازه‌لش حربی عملیات ایکی هفته‌دن بویان باشلنگن و حاضرگچه مذکور ولایت قیصار، المار و پشتونکوت تومن‌لریده دوام ایتماقده.
اونینگ ایتیشیچه، حاضرگچه قیصار، المار و پشتونکوت تومن‌لری نینگ 73 قیشلاغی طالب‌لردن تازه‌لنگن.
جناب بارزنینگ کوپیتیریشیچه، فاریاب ولایتی قیصار، المار، پشتونکوت و کوهستان تومن‌لریده یوزبیرگن توقنه‌شوو نتیجه‌سیده اوزبیکستان یشاوچیلری شامل 147 طالب هلاک بولگن و باشقه 150 ته‌سی یره‌لنگن.
فاریاب ولایتی سرپرستی‌نینگ ایتیشیچه، اوشبو 15 کون‌لیک عملیات نتیجه‌سیده، 12 جنگری طالب توتقونگه آلینگن.
اونینگ ایتیشیچه، امنیتی کوچلر اوتکن ایکی هفته‌ده یخشی یوتوق‌‌لرگه ایریشگن، پستونکوت‌ده 31 قیشلاق، المارده 34 قیشلاق و قیصارده 8 قیشلاق طالب‌لردن تازه‌لنگن.
بارز، فاریاب ولایتی کوهستان تومنی اوتکن نیچه‌کون‌ده سقوط عرفه‌سیده ایدی، بیراق طالب‌لرنینگ اوشبو تومن اوستی‌گه قیلگن هجومی خلق کوچلری و امنیتی کوچلر تامانیدن باشقریلیب آرقه‌گه چیکیلگن دیگن.
باشقه تاماندن، فاریاب محلی رسمی‌لری‌نینگ ایتیشیچه، مذکور ولایت‌ده یوزبیرگن توقنه‌شوولر نتیجه‌سیده، اوشبو ولایت قیصار، المار، پشتونکوت، خواجه سبزپوش، شیرین‌تگاب و دولت‌آباد تومن‌لریده 600 دن آشه‌راق عایله بدرغه بولگن.
اوشبو رسمی‌لرنینگ ایتیشیچه، یقین آره‌ده بدرغه بولگن عایله‌لرگه ییگولیک آزیق آوقت یاردم بیریله‌دی.
مملکت شمالی‌ده سونگی ناتینچ‌لیک‌لر حکومت ییریک رسمی‌لری، اینیقسه جمهور رییس بیرینچی اورین باسری‌نینگ بو حوزه‌گه تارتدی و ایتیلیشیچه، شمال‌دن طالب‌لرنی یوقاتیش اوچون جدی صورتده، سعی و حرکت بولماقده.
بغلان‌ده طالب‌لرنینگ ناملنگن ولسوالی هلاک بولدی
باشقه بیرخبرگه کوره، طالب‌لر سه‌شنبه کون ایرته‌لب بغلان ولایتی دندغوری منطقهسیده بیر امنیتی پوسته اوستی‌گه هجوم اویوشتیرگن و امنیتی کوچلر بیلن توقنشگن.
بغلان پولیس قوماندانی عبدالجبار پردلی‌نینگ سلام‌وطندارگه ایتیشیچه، بو توقنه‌شووده، دندغوری‌ده طالب‌لرنینگ ناملنگن ولسوالی مجید آخندزاده شامل 5 هجومچی طالب هلاک بولگن و باشقه 8 ته‌سی یره‌لنگن.
اونینگ کوپیتیریشیچه، بو توقنه‌شووده 3 پولیس عسکر یره‌لنگن، بیراق بغلان ولایتی کسل‌خانه مسوولی عین الدین صیادی‌نینگ سلام‌وطندارگه ایتیشیچه، حاضرگچه بو توقنه‌شوودن 23 یره‌لنگن کیشی بو شفاخانه گه آلیب کیلینگن.
جناب صیادی‌نینگ ایتیشیچه، بو توقنه‌شوولرده یره‌لنگن‌لرنی 10 ته‌سی تینچ اهالی بولیب، عیال‌لر و باله‌لر شامل بولگن.
عین حالده، طالب‌لر دندغوری منطقهسیده بیر کوپریک‌نی بوزیب، دندغوری تومنی و ولایت قتناو یولی‌نی خلق یوزی‌گه توسیب قویگن.
گزارش‌لرگه کوره، دندغوری تومنی کوپینچه منطقه‌سی ایکی آی‌دن بویان طالب‌لر نظارتیده بولگن.
