معمارلیک ایشی بیلن اورینیب یورگن فریدون کوتیلمهگن حالده پولیس صفیگه قوشیلیب و غزنی ولایتی اندر تومنیگه باریب طالبلرگه قرشی کورهشیش توغریسیده قرار قیلگن. بیراق بیر آی اوتگنیدن کیین، فریدوننینگ عایلهسیگه خبر کیلگن کیم، فریدون پولیس قرارگاهینی طالبلرگه ساتیب و اوشبو گروه تامانیدن اولدیریلگن.
فریدوننینگ سینگلیسیگه کوره، 19 یاشر ایناغهسی وطن یولیده جان بیرگن، بیراق دولت ادعا قیلهدی کیم، فریدون طالبلرگه همکارلیک قیلیب و دولتگه خیانت قیلگن. فریدوننینگ عایلهسینی ایتیشیچه، فرزندی غزنی اوروشیگه باریشدن آلدین، هیچ قچان قولیگه قورال آلمهگن. فرندوننینگ ایناغهسی هارونگه کوره ایتیشیچه، ایناغهسی حربی تعلیمات کورمسدن، توغری غزنی ولایتینینگ ناتینچ تومنلریدن بیریگه یوباریلگن.
فریدون، غزنی کیتگنیدن 20 کون کیین، تاغهسی بیلن تلیفون علاقه قوریب، طالبلرنینگ قولیگه توشگنینی ایتگن و تاغهسیدن آق سقاللرنی ییغیب بیر مقدار پول بیلن غزنیگه یوباریشینی سورهیدی.
فریدوننینگ تاغهسی سلاموطندار بیلن اوتکزگن صحبتیده ایتیشیچه، فریدون ایکی کوندن کیین، او بیلن تلیفون علاقه قوریب طالبلرنینگ قولیدن قاچگنینی ایتگن. اوندن بیر کون کیین، فریدوننینگ جسدی غزنی شهرینینگ یقینیدن تاپیلگن. فریدوننینگ عایلهسی جسدنی تانیش و تسلیم آلیش اوچون غزنی بارهدی. دیمک فریدوننینگ آنهسی اوغلینی تانیدی، بیراق غزنی جنایی مدیریتی جسدنی کابل عدلی طبیگه یوباریب و فریدوننینگ عایلهسیگه فرزندی تیریک و بو جسد باشقه کیشیگه تیگیشلی بولگنینی ایتهدی. بیراق کابل عدلی طبی بیر ضمانت خط آلیب، جسدنی اولرگه تاپشیرهدی.
فریدوننینگ الاولیغی امین شاهگه کوره، فریدون کیتهدیگن چاغیده، غزنی باریب پول قولگه کیریتیشینی ایتگن. دیمک معمارلیکدن قولگه کیریتگن پول عایلهسی اوچون ییترلی ایمسلیگینی بیلدیرگن. امین شاهنینگ ایتیشیچه، فریدون کوندهلیک ایشیدن 350 افغانی قولگه کیریتهدی ایکن.
فریدوننینگ دوستی نجیب، پولیس صفیگه قوشلیش اوچون فریدوننی غزنی آلیب بارگن؛ اونینگ ایتیشیچه، اوزی هم فریدون کبی حربی تعلیمات کورمسدن اوروشگه یوباریلگن. نجیبگه کوره، همراهلریدن 4 کیشی ایکی کون حربی تعلیمات کوریب و اوروشچین کملیگی باعث، امنیتی پوستهلرگه یوباریلگن.
نجیب سوزلری جریانیده بیر افسرنینگ آتینی آلگن. مذکور افسر، او و باشقه بیرقطار یاشلرنینگ پولیس صفیگه قوشیلیشگه ترغیب ایتگن. اوشبو افسرنینگ سلاموطندار بیلن اوتکزگن صحبتیده ایتیشیچه، اوزی هم 8 آیدن بویان حربی تعلیمات کورمسدن، غزنی ولایتی اندر تومنیده وظیفه بجرهدی.
اوشبو واقعه خصوصیده بولگن قیزیقرلی مسئله شو دیر کیم، نجیبنینگ ایتیشیچه، او و باشقه همراهلرینی پولیس صفیگه قوشیلیش اوچون ضمانت قیلگن کیشی، اولرنی اصلاً تانیمهیدی.
اوشبو لایحهسیزلیک و پولیس جلب و جذبیدهگی جاری مدیریت سیزلیککه جواب غزنی ولایتی امنیه قومندانی جنرال امینالله امرخیلنینگ ایتیشیچه، بو لایحهسیزلیکلرنی اصلی عامللری، اندر تومنی امنیه قومندانلیگی و مذکور عسکرلرگه ضامن بولگنلر دیر. شونینگدیک، جناب امرخیلنینگ فریدون اولیمی توغریسیده ایتیشیچه، فریدون اندر تومنی امنیه قومندانلیگی تامانیدن، جاری ییل 11- قوسده پولیس صفیگه جذ ایتیلگن. بیراق اندر امنیه قومندانلیگی، فریدون و اورتاقلریگه حربی تعلیمات بیرمسدن اوروش اوچون پوستهگه یوبارگن.
جناب امرخیلنینگ کوپهیتیریشیچه، 27- قوس اندر تومنیده پولیس قرارگاهی اوستیگه طالبلر تامانیدن اویوشتیریلگن هجوم چاغیده، قرارگاه قومندانی رخصتسیز اوی کیتگن ایکن. فریدون اوشه کیچه، بیر همراهسینی اولدیریب و باشقه بیر همراهسینی یرهلنتیرگن. جنرال امرخیل، اوشه کیچه یرهلنگن عسکردن نقل قیلیب ایتیشیچه، فریدون همراهلریگه هجوم قیلگنیدن کیین، قرارگاهنی ترک ایتیب و طالبلرگه قوشیلگن.
غزنی امنیه قومندانینینگ ایتیشیچه، حاضر پولیس قرارگاهی ساتیلگن قضیهسی بیلن فریدوننینگ قتل دوسیهسی باش قارهلاوچیلیک تیکشیرووی آستیده بولگن. غزنی ولایتی جنایی مدیری عبدالقهارنینگ سلاموطندارگه ایتیشیچه، اولرنینگ تیکشیروولری اساسیده، فریدون قرارگاهنی طالبلرگه ساتگن. بیراق حاضرگهقدر طالبلر فریدوننی نیمه اوچون اولدیرگنی بیللی ایمس. غزنی جنایی مدیرینینگ کوپهیتیریشیچه، شونینگدیک قرارگاه قومندانینینگ طالبلر بیلن علاقهسی بار ایکن و حاضر پولیس تورمهسیده بولگن.