بغلان ولایتینینگ امنیتی رسمیلری، مذکور ولایتده طالبلرنینگ یانیده روس و پاکستانلیک مصلحتچیلر بارلیگیدن خبر بیرهدیلر.
بغلان پولیس قومندانینینگ ایتیشیچه، اوشبو ولایتنینگ طالبلریگه روسیه و پاکستان فقرالری مصلحت بیریب و امنیتی کوچلرگه قرشی اوروشده مذکور گروهگه یاردم بیرهدیلر.
بغلان پولیس قومندانیگه کوره، طالبلرنینگ منطقهیی طرفدارلری، مصلحتچی تعیین ایتیب و مملکتده اوروش و ناتینچلیکلرنی کوپهیتیریب و افغانستاننینگ جهانی بیرلشیکلرینی اوروش میدانلریده سقلشنی ایستهیدیلر.
سهشنبه کون بغلان ولایتیده خبری ییغین اوتکزگن مذکور ولایت پولیس قومندانی اکرامالدین سریع، بغلاندهگی طالبلرنینگ یانیده روس و پاکستانلیک مصلحتچیلر بارلیگیگه اشاره قیلیب ایتیشیچه، افغانستاننینگ جهانی بیرلشیکلری بیلن رقابتگه بولگن مملکتلر، استراتیژیکی مقصدلریگه ییتیشیش اوچون افغانستان اینیقسه بغلان ولایتینی ناتینچ قیلیش اوچون سعی و حرکت قیلهدیلر.
بغلان پولیس قومندانیگه کوره، اوشبو ولایتنینگ دهنهغوری تومنی، پلخمری شهرینینگ دندغوری و دند شهابالدین منطقهلریده مولوی شمسالدین رهبرلیگیده عرب و چچینلیک مصلحتچیلر یانیده روس و پاکستانلیک مصلحتچیلر هم اورین آلگنلر.
جناب سریعنینگ ایتیشیچه، دنیا جماعه چیلیگینینگ حضوری و افغانستان دولتیدن امریکا قوشمه ایالتلرینینگ حمایتی، منطقه مملکتلریدن بیرقطارینی خواطرگه سالگن و حاضر اولر، افغانستانده ناتینچلیکنی کوپهیتیریش اوچون سعی و حرکت قیلهدیلر.
بوندن آلدین هم، بغلانده طالبلرنینگ یانیده نقاب کیگن کیشیلر حضوری توغریسیده گزارشلر بیریلگن ایدی و ایتیلیشیچه، روسیهلیک عیاللر، طالبلرنینگ مصلحتچیسی صفتیده، دندغوریده فعالیت قیلهدیلر.
بیراق، کابل بوییچه روسیه ایلچی خانهسی و مذکور مملکتنینگ تشقی ایشلر وزیرلیگی، نیچه مرته طالبلردن حمایه قیلیشلرینی رد قیلگن.
اوشبو ییغینده بغلان حاکمی عبدالحی نعمتینینگ ایتیشیچه، ییر و هوایی کوچلر امنیت تأمین ایتیش اوچون بغلان کیلگنلر.
شونینگدیک، 209 شاهین قول اردو اورین باسری رجبعلی راشدنینگ ایتیشیچه، تیزلیکده دهنۀغوری تومنی، دندغوری و دندشهابالدین منطقهلرینی طالبلرنینگ نظارتیدن چیقاریش اوچون کینگ حربی عملیات یولگه قوییلهدی.