افغانستان شمالی‌ده جایلشگن سرپل ولایتی‌دن ییتیب کیلگن خبرلرده، قورال‌لی طالبلر کوهستانات ولسوال‌لیگی‌ده محلی پولیس همده دولت ملازم‌لرینی آگاهلنتیریب، بیر هفته‌گه قدر اوزلرینی مذکور گروه‌گه تسلیم قیلمه‌گن حالده، مال مُلک‌لرینی چور بولیب یشش بنالری اوت‌گه یاندیریله‌دی.
کوهستانات ولسوال‌لیگی‌نینگ رواجلنتیریش کینگشی رییسی عزیزالله صابری‌نینگ سلام‌وطندارگه بیلدیریشیچه، قورال‌لی طالبلر بیر اعلامه ترقه‌تیب محلی پولیس همده دولت ایشلاووچی‌لرینی تهدید قیلگن. جنگری‌لرگه کوره، محلی پولیس اوز قورال اسلحه‌سینی ییرگه قوییب مذکور گروه‌گه تسلیم بولمه‌گن حالده، اویلری چور بولیب اوت‌گه یاندیریلگن‌دن سونگ فقط بندنلریده‌گی کییم بیلن ولسوال‌لیک‌دن هیده‌له دیلر.
جناب صابری، طالبلر علف سفیدده پارتلش صادر قیلیش بیلن مذکور ولسوال‌لیک یولینی توسیب قویگن‌لر. ایتیلیشیچه، منطقه اهالیسی کونده‌لیک قیین‌چیلیک‌لرینی برطرف قیلیش اوچون بیش کیلو متر مصافه‌نی یوریدی‌لر.
اونگه کوره، کوهستانات ولسوال‌لیگی‌نینگ یولی باغلنگنی سبب ییگولیک آذوق آوقت نرخی اوچ برابرگه آشگن.
باشقه تاماندن سرپل عیاللر ایش‌لری بوییچه اداره رییسی نسیمه آرزوگه کوره، کوهستانات ولسوال‌لیگی‌ده حامله‌لی عیاللر همده کسل‌لر اوچون شفاخانه بولمه‌گن‌لیگی سبب کوز یاریش پیتی‌ده حیاتدن اوته‌دیلر.
خانم آرزو، مرکز دولت مذکور ولسوال‌لیک یولینی آچمه‌گن حالده، ولسوال‌لیکده‌گی کوپچیلیک حامله‌لی عیاللر عالم‌دن اوتیشی ممکن دیگن.
اونگه کوره، هنوزگچه حامله‌لی بیش عیال یول‌ده حیاتدن کوز یومگن.
عین حالده، سرپل ولایت کینگشی‌نینگ اعضاسی محمد حسین مجاهدنینگ سلام‌وطندارگه بیلدیریشیچه، ولایت‌نینگ سرپل ولسوال‌لیگی بیر آیدن بیری قورال‌لی طالب‌لرنینگ نظارتی‌گه اوتگن و اهالی جدی قیین‌چیلیک بیلن روپه ره.
جناب مجاهد، حاضرگی کونده مذکور ولسواللیکده حربی تازه‌لش عملیات توخته‌تیلگن دیگن. اونگه کوره، بو ولسوال‌لیک طالبلر نظارتی‌دن چیقاریشلیشی اوچون دولت نینگ هیچ قنده‌ی برنامه‌سی یوق.
ولایت کینگشی‌نینگ بو اعضاسی کوهستانات ولسوال‌لیگی‌گه ییگولیک آذوق آوقت ییتکزیب بیریلمسه، مذکور ولسواللیکده انسانی فاجعه یوز بیریشی مملکن لیگی باره‌سیده خواطر بیلدیرگن.
عین حالده، افغان ملی کوچلری اوشبو ولسوال‌لیک طالبلر قولی‌دن آزاد ایتیلیشی اوچون «شمشیردو» و «خورشیدسه» ناملی حربی تازه‌لش عملیات باشلگن ایدی، لیکن ایتیلیشیچه حاضر بو حربی عملیات توخته تیلگن.
