سرپل ولایتی کینگش باشلیغی محمدنور رحمانی نینگ سلام‌وطندارگه ایتیشیچه، طالبان جنگریلری اوتگن کیچه یینگیل و آغیر قورال بیلن سرپل مرکزیده بولگن قشقری پوسته‌سی، جوزجان- سرپل قتناو یولی و سوزمه‌قلعه تومنیده هجوم قیلگنلر.
سرپل ولایتی کینگش باشلیغی‌گه کوره، امنیتی کوچلر و طالبان جنگریلری آره‌سیده یوز بیرگن آتیشمه بوگون ایرته‌گه‌قدر دوام تاپگن و نتیجه‌ده امنیتی کوچلردن 4 ته‌سی هلاک و باشقه 32 ته‌سی یره‌لنگن دیر.
جناب رحمانی نینگ کوپه‌یتیریشیچه، طالبان گروهی اوشبو هجومده امنیتی کوچلر تانک‌لریدن 4 ته‌سینی تخریب قیلیب و اوشبو کوچلر قطار حربی تجهیزات‌لرینی اوزلری بیلن آلیب کیتگن.
عین‌حالده، سرپل حاکمی سوزلاوچیسی ذبیح‌الله امانی نینگ ایتیشیچه، اوشبو آتیشمه‌لر نتیجه‌سیده، طالبان جنگریلریدن 15 ته‌سی و امنیتی کوچلردن 4 ته‌سی هلاک ایتیلیب و شونینگدیک، امنیتی کوچلردن 22 ته‌سی و طالبان جنگریلریدن 20 ته‌سی یره‌لنگن دیر.
سرپل حاکمی نینگ سوزلاوچیسی‌گه کوره، طالبان هجومی کیینگه اوریلگن، بیراق مذکور منطقه‌ده طالبان گروهی‌نینگ حضوری بولگنی سبب، وضعیت خواطرلنتروچی دیر.
عین‌حالده، پکتیا و غور ولایت‌لری‌نینگ محلی مسووللریگه کوره، طالبان جنگریلری اوشبو ولایت‌لرده قطار امنیتی پوسته‌لر اوستیگه هجوم قیلگن.
پکتیا پولیس قومندانلیگی سوزلاوچیسی سردارولی تبسم نینگ ایتیشیچه، طالبان گروهی نینگ هجومی نتیجه‌سیده، پولیس کوچلریدن 3 ته‌سی و طالبان جنگریلریدن 2 ته‌سی هلاک ایتیلیب و شونینگدیک، پولیس رسمی‌لریدن 4 ته‌سی و طالبان جنگریلریدن 2 ته‌سی یره‌لنگن دیر.
باشقه بیرتاماندن غور پولیس قومندانی نثاراحمد عبدالرحیم‌زی نینگ سلام‌وطندارگه ایتیشیچه، طالبان جنگریلری اوتگن کیچه فیروزکوه شهری نینگ قطس قیشلاغیده مردمی کوچلر پوسته‌سی اوستیگه هجوم قیلیب نیتجه‌ده، ایکی پولیس و 6 طالب هلاک ایتیلیب و باشقه ایکی پولیس و 4 طالب یره‌لنگن دیر.
عین‌حالده، طالبان گروهی نینگ بیر خبرنامه آرقه‌لی ادعا قیلیشیچه، سرپل، غور و پکتیا ولایت‌لریده اوشبو گروه تامایندن اویوشتیریلگن هجوم‌لرده امنیتی کوچلرده کوپینچه تلفات ییتیشگن.
