ناتو تشکیلاتی نینگ باش کاتبی ینس استولتنبرگ، طالبان گروهی دن هجوملرینی توخته‌تیب، آمریکا بیلن امضالگن تینچلیک کیلیشوونامه‌سینی بوتونله‌ی عمل‌گه آشیریشی‌نی و زوروانلیک‌لرنی کمه‌یتیریشی‌نی طلب قیلگن.
جناب استولتنبرگ بو سوزلرینی بوگون «سه‌شنبه، 26- حمل» ناتوگه اعضا مملکت‌لرنینگ مدافعه وزیرلرینی ییغینیدن آلدین بیان قیلگن.
ناتو تشکیلاتی نینگ باش کاتبی، افغانستانده تینچلیک تأمین‌لنیشی خصوصیده بولگن بیرینچی یول زوروانلیک‌لر کمه‌یتیریلیشی، آمریکا و طالبان آره‌سیده امضالنگن تینچلیک کیلیشوونامه بوتونله‌ی عمل‌گه آشیریلیشی و طالبان گروهی نینگ هجوملری توخته‌تیلیشی گه دییدی.
او، افغانستاندن ناتو تشکیلاتی نینگ حمایتی دوام ایتیشی‌نی اعلان قیلیب ایتیشیچه، بو تشکیلات آمریکا و طالبان آره‌سیده‌گی تینچلیک کیلیشوونامه و شونینگدیک، محبوس‌لر قوییب یوباریلیشی‌دن حمایت قیله‌دی.
ینس استولتنبرگ نینگ کوپه‌یتیریشیچه، افغانستان خوفسیزلیک کوچلریدن ناتو تشکیلاتی نینگ حمایتی و تعلیم بیریش مأموریتی دوام ایته‌دی و بو تشکیلات افغانستان حکومتی و خلقی گه بیرگن بوتون سوزلرینی توته‌دی.
عین دمده، ملی خوفسیزلیک کینگشی نینگ ایتیشیچه، طالبان گروهی افغانستان اهالیسی نینگ برابریده زوروانلیک‌لرینی کوپه‌یتیرگن.
ملی خوفسیزلیک کینگشی‌نینگ سوزلاوچیسی جاوید فیصل میدیالرگه یوبارگن پیامی ده ایتیشیچه، افغانستان دولتی تینچلیک‌که ایریشیش خصوصیده بولگن سعی و حرکت‌لرینی اوتمیش‌گه نسبتن کوپه‌یتیرگن، بیراق طالبان گروهی عکسینچه افغانستان اهالیسی نینگ برابریده زوروانلیک‌لرینی شدتلنتیرگن.
جناب فیصل نینگ ایتیشیچه، تینچلیک‌که ایریشیش اوچون طالبان گروهی افغانستانلیک‌لرنی اولدیریش‌دن قول تارتیب دایمی و مملکت بویلب آتیش‌کیسین اوستیگه کیلیشیب و اهالی بیلن یره‌شیشی کیره‌ک.
طالبان گروهی حاضرگه‌قدر بو توغریده فکر بیلدیرمه‌گن.
شونینگدیک، ایکی کون آلدین ملی خوفسیزلیک کینگشی نینگ ایتیشیچه، طالبان گروهی اوتگن 7 کونده 9 ولایتده کمیده 30 تینچ اهالی‌نی اولدیرگن و باشقه 2 ته‌سینی یره‌لنتیرگن.
جاوید فیصل گه کوره، هلاک ایتیلگن تینچ اهالی‌لردن کوپینچه‌سی یولده ییرلشتیریلگن ماین پارتله‌شی عاقبتیده هلاک بولگن‌لر.
ملی خوفسیزلیک کینگشی سوزلاوچیسی نینگ اورغولشیچه، طالبان گروهی تینچ اهالی گه زیان ییتمه‌سی و تینچلیک سعی و حرکت‌لری نتیجه بیریشی اوچون آتیش‌کیسین قیلیشی کیره‌ک.
