افغانستان جمهورلیک ریاست سرایی، اوتگن «شنبه، 3- جوزا» هییت کونلریده طالبان گروهی تامانیدن آتیش‌کیسین برقرار ایتیلیشی گه جواب مذکور گروه نینگ محبوسلریدن 2000 ته‌سی قوییب یوباریلیشی‌نی باشله‌دی. طالبان گروهی محبوسلریدن 2000 ته‌سی قوییب یوباریلیشی توغریسیده افغانستان حکومتی نینگ قرارینی یخشی بیر آدیم دیگن.
قطرده طالبان گروهی نینگ سیاسی دفتری سوزلاوچیسی سهیل شاهین، اوتگن کون «یکشنبه، 4- جوزا» کیچ پیت قیلگن توییتده ایتیشیچه، طالبان و آمریکا آره‌سیده امضالنگن تینچلیک کیلیشوونامه اساسیده، ایکی تامان آره‌سیده ایشانچ قولگه کیریتیلیشی اوچون طالبان نینگ محبوسلریدن 5000 ته‌سی قوییب یوباریلیشی کیره‌ک.
سهیل شاهین محبوس‌لر قوییب یوباریلمه‌گنینی افغانستانلیک‌لر ارا مذاکره باشله‌نیشی گه توسیق دیگن.
اوتگن کون «یکشنبه، 4- جوزا» جمهورلیک ریاست سرایی نینگ اعلان قیلیشیچه، طالبان گروهی تامانیدن آتیش‌کیسین برقرار ایتیلیشی گه جواب مذکور گروه نینگ محبوسلریدن 2000 ته‌سی قوییب یوباریلیش جریانی باشلنگن.
شنبه کون، 3- جوزا، کیچ پیت طالبان گروهی اوچ کون هییت ده افغانستان حکومتی بیلن آتیش‌کیسین قیلیشی‌نی بیلدیردی. افغانستان حکومتی، طالبان گروهی تامانیدن آتیش‌کیسین اعلان قیلینیشی‌‌نی خوش قرشی‌لش گه علاوه ایتیشیچه، افغانستان دولتی هم آتیش‌کیسین قاعده‌سینی رعایت قیلیش گه اراده‌لی دیر.
آمریکا و طالبان گروهی آره‌سیده امضالنگن تینچلیک کیلیشوونامه اساسیده، طالبان گروهی نینگ 5000 محبوسی افغانستان حکومتی نینگ 1000 محبوسی برابریده قوییب یوباریلیشی توغریسیده قرار قیلینگن. طالبان گروهی محبوس‌لری قوییب یوباریلیشی‌نی افغانستانلیک‌لر ارا مذاکره باشله‌نیشی اوچون پیش‌شرط دیگن.
