.jpg)
محمود حقمل سخن‌گوی والی بغلان به سلام‌وطندار می‌گوید که صبح امروز (چهارشنبه) طالبان در منطقۀ بابه‌نظر دندشهاب‌الدین، دو پایۀ دیگر برق را نیز تخریب کرده اند.
آقای حقمل می‌گوید که این پایه‌ها 70 وات برق وارداتی تاجیکستان را به کابل انتقال می‌دادند و از این به بعد تا مدتی نامعلوم شهروندان کابل از برق وارداتی تاجیکستان نیز محروم خواهند بود.
پیش از این نیز طالبان ۴ پایه برق وارداتی ازبکستان را در ساحۀ دندشهاب‌الدین تخریب و پایتخت را در تاریکی فرو بردند.
گفته می‌شود که طالبان به دولت افغانستان هشدار داده بودند که اگر به دندشهاب‌الدین برق توزیع نکند؛ عملیات نظامی را در دندغوری متوقف نسازد و نیروهایش را از این ساحه بیرون نکشد، طالبان سایر پایه‌های برق را نیز تخریب خواهند کرد.
مسؤولان محلی در بغلان می‌گویند که آنان تا پایان عملیات خورشید 20 در دندغوری، نمی‌توانند عملیات دیگری را در دندشهاب‌الدین راه‌اندازی کنند.
نزدیک به ۱۵ روز است که عملیات گستردۀ نظامی در ساحۀ دندغوری، برای پاکسازی این ساحه از وجود طالبان راه‌اندازی شده است؛ اما تاکنون این عملیات بی‌نتیجه بوده و حکومت نتوانسته به آن نقطۀ پایان بگذارد.
