د هیواد ځینو صنعتکارانو په یوه اعتراضیه غونډه کې، چې د بریښنا د بیې د لوړیدو په هکله جوړه شوې وه پر حکومت سختې نيوکې وکړې.
هغوی وایي، که حکومت ژر تر ژره د بریښنا بیه ټیټه نه کړي، ټول صنعت کاران او پانګوال به خپلې فابریکې وتړي.
صنعت کاران وایي، سربیره پر دې چې مخکې له دې د هرکلیو واټ بریښنا بیه ۶ افغانۍ وه، خو هغه وخت هم د دوی وسه نه رسېده، اوس د بریښنا شرکت د هرکیلو واټ بریښنا قیمت ۷ نیمې افغانۍ ټاکلی دی.
د افغانستان د صنایعو ټولنې رییس سخي احمد پیمان د دوشنبې په ورځ (اګست ۲۱مه) خبري غونډه کې وویل، د وزیرانو شورا، د مالیې وزارت او د اقتصاد وزارت د پریکړې پر بنسټ، باید ټول صنعت کاران د هرکیلو واټ صنعتي بریښنا د لګښت له پاره۶ افغانۍ ورکړي، خو اوس د بریښنا شرکت د صنعتي شرکتونو د بریښنا بیه له ۶ افغانیو ۷،۵ افغانیو ته پورته کړې ده، چې ټولټال ۲۵ سلنه راځي.
پیمان وایي، د برېښنا شرکت له د برېښنا په نرخ کې د زیاتوالي لامل په اړه معلومات نه لري.
نوموړي وویل، چې د برېښنا شرکت له لوري دغه پريکړه په داسې حال کې کيږي، چې په دې هکله نه د هیواد د صنایعو ټولنې او نه هم د ولسي جرګې غړي په جریان کې اچول شوي.
پیمان زیاتوي، چې په ټول هیواد کې له ۱۸۰۰ څخه ډیر صنعتي شرکتونه کار کوي او که د بریښنا شرکت د بریښنا بیه ټیټه نه کړي، ټول صنعت کاران او پانګوال به خپل شرکتونه وتړي او په پایله کې به یې د هیواد اقتصاد له ستونزو سره مخ شي.
و مو غوښتل، چې په دې اړه د بریښنا شرکت نظر هم واخلو، خو له ډېرو هڅو وروسته بریالي نه شو.