د ملي دفاع وزارت لوی درستیز جنرال قدم شاه شهیم نن چهارشنبه ( اپرېل ۱۳مه) د یوې خبري ناستې پر مهال د هېواد امنیتي حالاتو په اړه وویل، چې په وارسا کې د ناټو تړون غړو هیوادونو غونډه کې د ګډون له پاره افغان دولت ۵ کلن امنیتي پلان جوړ کړی.
شهیم زیاته کړه، دغه ۵ کلن پلان په هیواد کې د دایمي امنیت ټینګښت په موخه چمتو شوی دی.
د هغه پر خبره، دغه پلان د افغانستان امنیت ټینګښت، بیارغونې، ښه حکومتوالي او تل پاتې سولې او امنیت په اړه دی.
دغه راز، لوی درستیز وویل، د عمري په نوم د طالبانو پسرلني عملیات پروپاګند دی.
طالبانو تېره ورځ د یوې خبرپاڼې په خپرولو سره ویلي و، چې د عمري په نوم پسرلني عملیات یې پیل کړي دي.
خو شهیم ولس ته ډاډ ورکوي، چې افغان امنیتي ځواکونه د هر راز، بریدونو شنډولو چمتووالی او توان لري.
په همدې حال کې د ولسمشر ویاند مرستیال دواخان مینهپال هم نن په کابل کې خبريالانو ته وویل، چې په ۵ کلن امنیتي پلان کې ګواښونه، دښمن او تر احتمالي ګواښ لاندې سیمې، تعریف او پر ضد يې مبارزه هم تعریف شوې.
مینه پال زیاته کړه، دغه پلان د هیواد ټولې سیمې رانغاړي.
نوموړي دا هم وویل، چې په دغه پلان کې د امنیتي ځواکونو ټولې اړتیاوې څیړل شوي او د هغه پر خبره دا یو هر اړخیز پلان دی، چې په پلي کیدو سره يې د هیواد ټولې سیمې تر امنیتي پوښښ لاندې راځي.
له بل لوري د پوځي چارو شنونکي متقاعد جنرال عتیق الله امرخیل سلام وطندارته وویل، چې که په پلان کې د افغانستان اراضي له پاره ځواک محاسبه شوی وي او کافي شمیر ځواک، سلاح او قوي روزنه وي بیا کولای شي ټول هیواد تر پوښښ لاندي راولي.
افغان چارواکي داسې مهال د امنیت ټینګښت ډاډ ورکوي، چې په دې وروستیو کې د دولت وسله والو مخالفینو خپلو بریدونو ته زور ورکړی.