قدم‌شاه شهیم، رییس ستاد ارتش وزارت دفاع ملی امروز (شنبه) در نشستی مشترک خبری با معین ارشد امنیتی وزارت داخله کشور می‌گوید، آنان در یک سال گذشته 1955 داعشی را در سراسر کشور از پا درآورده‌اند. او می‌گوید،11 ازبیکستانی، 8 عربی، 7 چیچینی، 4 چینایی و 4 تاجیکستانی شامل این کشته شده‌ها اند.
به گفتۀ آقای شهیم، عملیات‌ها به هدف سرکوب داعش در ننگرهار جریان دارد و تاکنون فعالیت این گروه را در سه ولسوالی محدود ساخته‌اند.
آقای شهیم هشدار می‌دهد که هر کشوری که هراس‌افگنان را حمایت کند، دهشت‌افگنی و حملات تروریستی دامن‌گیرش می‌شود.
عبدالرحمان رحمان، معین ارشد وزارت داخله می‌گوید، نیروهای امینیتی در چندین ولایت عملیات پاک‌سازی را راه‌اندازی کرده است که بیشتر ولسوالی‌ها از وجود داعش و دیگر گروه‌های هراس‌افگن پاک شده است.
