د اقتصادي برخې ځېنې شنونکي ۱۳۹۶ له ننګونو ډک کال بولي او وايي، له اقتصادي پلوه پهدې کال کې د افغانانو ژوند د هوساینې او بدلون برخو کې ګټور پرمختګ نهدی شوی.
د اقتصادي چارو شنونکی محمد شبیر بشیري له سلام وطندار سره خبرو کې وویل چې په ۱۳۹۶ کال کې د خلکو د پېرېدلو کچه ټیټه شوې او د بېکارۍ په کچې کې هم کموالی نه، بلکې ډېروالی راغلی دی.
بلهخوا د اقتصادي چارو بل کارپوه اذرخش حافظي د هېواد د اقتصادي وضعیت او اقتصادي پرمختګ د امنیت او ثبات په تامین پورې تړلی بولي.
د ده په باور، کله چې سوله، امنیت او ثبات نه وي؛ متشبثین پانګونه نهکوي او کله چې جګړه وي؛ د بهرنیو شتمنیو جلبولو کې هم کموالي راځي. د ښاغلي حافظي په وینا، تېر مالي کال کې نسبت د نفوسو کچې ته د افغانستان د اقتصادي پرمختګ کچه ټيټه وه.
خو د احصاییې مرکزي ادارې چارواکي هېواد کې د ۱۳۹۶ کال لومړیو نهو میاشتو کې د ناخالصو کورنیو تولیداتو له زیاتوالي خبر ورکوي.
د دې اداري اداري مرستیال حسیبالله موحد وايي، سږ کال د کرنې برخې تر یوه حده پرمختګ کړی چې د کوکنارو په ګډون ناخالصو کورنیو تولیداتو کې د کرکیلې ونډه ۳۲.۴ سلنې ته رسېږي چې په ناخالصو کورنیو تولیداتو کې د صنعت ونډه بیا ۱۸ سلنه او د خدمتونو ونډه ۴۹ سلنه ده.
ښاغلی موحد زیاتوي، د ۱۳۹۵ کال په پرتله د صادراتو او وارداتو برخې کې ښهوالی راغلی او د سوداګرۍ د بېلانس کسر هم کم شوی چې له ۹۰ سلنې نه ۸۸.۶ سلنو ته راټیټ شوی.
د احصاییې مرکزي ادارې مرستیال همدارنګه وايي، د ناخالصو کورنیو تولیداتو د زیاتوالي پر بنسټ، تمه ده دې کال کې د افغانستان اقتصادي پرمختګ ۲.۳ سلنې ته ورسېږي.
د پانګونې، صنعت او سوداګرۍ وزارت ویاند مسافر قوقندي هم وايي، افغانستان ۱۳۹۶ کال کې د سوداګرۍ، اقتصاد او ټرانزیټ په برخو کې ښې لاسته راوړنې لرلې.
د ده په خبره، سږکال د ژمنې شوې او په کار لګېدلې پانګونه ۵۰۰ میلیونو ډالرو ته رسېږي.
د احصاییې مرکزي ادارې چارواکي وايي، ځېنې وخت د دې امکان هم چې چې ستونزې رامنځته شي؛ خو په ټوله کې د هېواد اقتصادي وضعیت ښهوالی او اقتصادي پرمختګ د وګړیو له پرمختګ نه لوړ دی.
د هغوی په وینا، کله چې د اقتصادي پرمختګ کچه د وګړیو له پرمختګ نه لوړه وي؛ د اقتصادي وضعیت د مخ په ښه کېدو معنا ورکوي.
هرات کې د ټاپپي پروژې لهمخې د افغانستان او پاکستان له لارې هند ته د ترکمنستان د ګازو لېږد پروژې عملي چارو پیل، د هند له دوو ښارونو او د قزاقستان له الماتا ښار سره د افغانستان د هوايي لېږد ـ رالېږد دهليزونو پرانېستل او له یو ترکي شرکت سره د کجکي برېښنا بند له دویمې برخې د برېښنا تولید او اخېسلتو تړون لاسلیکول؛ له نورو هغهو کارونو څخه دي چې ۱۳۹۶ کال کې د افغانستان په اقتصادي برخه کې رامنځته شويدي.