تېره ورځ په ځينو رسنيو کې داسې راپورونه خپاره شول، چې ګني د پاکستان حکومت په ځانګړي ډول اې، ايس اې په پام کې لري، چې د حقاني شبکه د افغانستان خوست او پکتیا ولایتونو ته وليږدوي.
د چارو څېړونکي وايي، چې که پاکستان د حقاني شبکه د افغانستان خوست او پکتیا ولایتونو ته ولېږدوي په دې سره به په افغانستان کې جګړې زور واخلي.
دوی وايي، چې کابل ته څېرمه ولایتونه به د اوس په پرتله له ستر امنیتي ګواښونو سره مخ شي او پاکستان به په دې سره ځان د امریکا او د نړۍ نورو هېوادونو له فشارونو وژغوري.
د پوځي چارو شنونکی عتیق الله امرخېل وايي، چې د پاکستان دا لوبه ډېره خطرناکه ده، ځکه پر وینا يې، د پکتیا او خوست غرني او په ځنګلونو پوښلي ولایتونه دي او دغه ځایونه د ترهګرو د پټنځای له پاره خورا ښه دي.
د نوموړي پر وینا، نه یوازې دا چې پکتیا او خوست پلازمينې کابل ته څېرمه ولایتونه دي، بلکې حقاني خپله هم د پکتیا اوسیدونکی دی او د خپل نفوذ څخه په استفادې به د ځوانانو له اوزګارتیا ناوړه ګټه واخلي او خپلو لیکو ته به يې جذب کړي.
امرخېل خبرداری ورکوي، چې که افغان دولت دغې موضوع ته جدي پاملرنه و نه کړي، نو شونې ده، چې په کابل کې به هم ناامني زیات شي.
امرخېل وايي، که حقاني شبکه یو وار په دغو ولایتونو کې ځای پر ځای شو، نو بیا به يې د درېيو قل اردو ګانو ځواکونو زور هم پرې و نه شي رسيدای.
هغه عمده دلیل يې د پکتیا غرونه او ګڼ ځنګلونه په ګوته کوي.
په همدې حال کې د چارو بل څېړونکی عبدالغفار ګردیزی وايي، چې دا به ډېر ګواښونکی کار وي او د امریکا په ګډون به د افغان امنیتي ځواکونو له پاره بدمرغۍ وزيږوي.
له بل لوري د ملي دفاع وزارت ویاند جنرال دولت وزیري بیا وايي، چې د حقاني شبکه که دلته جګړه کوي، نو د القاعده او نورو ترهګرو په څېر د افغانانو دوښمنه شبکه ده او افغان ځواکونه به دوی ته هیڅکله د فعالیت اجازه ور نه کړي.
اوسمهال حقاني شبکه د پاکستان په وزیرستان کې پټنځایونه لري او د افغان حکومت پر وینا، دغه شبکه له هماغه ځایه پر افغان امنیتي ځواکونو او عامو وګړو خونړي بریدونه طرحه کوي.
په دې وروستیو کې پر پاکستان د امریکا فشارونه ډېر شوي دي او څو ځله پر پاکستان د امریکا ژمنې شوې په میلیونونه ډالر مرسته هم له دې امله کنګل شوي، چې ګواکې پاکستان د نورو ترهګرو شبکو پر وړاندې رښتینې مبارزه نه کوي.