نماینده‌لر کینگشی سیلاوی نینگ نتیجه‌سیگه قرشی ناراضیلیک بیلدیرگن 11 عیال‌دن 4 ته‌سی بوگون آغیزلرینی تیککن‌لر.
اوشبو ناراضیلیک بیلدیرگن عیاللر شکایت‌لری تیکشیریلیشی اوچون خاص محکمه قوریلیشی‌نی سوره‌گن.
ناراضیلیک بیلدیرگن عیاللردن بیری هلیه مجتبی نینگ اوز فیسبوک صحیفه‌سیده یازیشیچه، ناراضیلیک بیلدیرگن عیاللرنینگ اعتراضی ینگی باسقیچ گه کیرگن و اولر آغیزلرینی تیکیب آچلیک اعلان قیلگن‌لر.
خانم مجتبی نینگ ایتیشیچه: «ناراضیلیک بیلدیرگن عیاللر حقلری گه ایریشیش اوچون بوگون آغیزلرینی تیکیب رسمی شکلده آچلیک اعلان قیلگن‌لر.»
قندوز، لوگر، قندهار، میدان‌وردک، هلمند و ننگرهار ولایت‌لری نینگ اعتراضچی نامزدلری کمیده اوچ آیدن بویان جمهورلیک ریاست سرایی نینگ کیریش ایشیگی برابریده تحصن خیمه قورگن‌لر.
اعتراضچی نامزدلرنینگ ایتیشیچه، نماینده‌لر کینگشی سیلاوی نینگ دستلبکی نتیجه‌سیده یوتوققه ایریشگن‌لری اعلان قیلینگن، بیراق پول معامله‌سی و اخلاقی فساد باعث، سونگی نتیجه‌ده اولرنینگ اورنی گه باشقه کیشی‌لر نماینده‌لر کینگشی گه یوباریلگن.
نماینده‌لر کینگشی نینگ سیلاوی اوتگن ییل، 28- و 29 میزان ده یولگه قوییلیب کوپینچه جنجل‌لرگه سبب بولدی و یوتوققه ایریشمه‌گن نامزدلرنینگ ناراضیلیک‌لری حاضرگه‌قدر دوام ایتماقده.
