امریکه قوشمه ایالت‌لری جمهور رییسی بارک اوبامانینگ ینگی قرارینی خوش قرشیلهگن افغانستانلیک بیر قنچه سیاسی تحلیلچی‌لر، هر قنده‌ی حربی عملیات افغانستان ملی کوچلری هماهنگ‌لیگی بیلن عملی بولیشی‌نی ایتگن‌لر.
رویترزنینگ گزارش قیلیشیچه، امریکه جمهور رییسی بارک اوباما سونگی قراریده افغانستانده ییرلشگن خلق ارا کوچلریگه مملکت‌ده قوراللی طالب‌لرگه قرشی اوروش‌ده افغان ملی کوچلری بیلن یانمه یان توریب اوروش آلیب باریش رخصتی‌نی اعلان قیلگن. شونینگ‌دیک اوبامانینگ بو قراریده اوروش‌ده خلق ارا هوا کوچلری عملیات‌لرده اشراک قیله‌دی.
اوباما نینگ بو قرارینی دستکلب خوش قرشیلهگن قطار سیاسی تحلیلچی‌لر، امریکه‌لیک حربیلرنینگ عملیاتی افغانستان ملی کوچلری هماهنگ‌لیگی بیلن اوتکزیلمه‌گن تقدیرده، تینچ اهالی تلفات میزانی آشیشی ممکن لیگی‌دن خواطر بیلدیرگن‌لر.
سیاسی تحلیلچی کابل‌خان تدبیرنینگ مساله توغریسی‌ده ایتیشیچه، امریکه‌لیک‌لر افغان ملی کوچلری هماهنگ‌لیگی بیلن عملیات اوتکزگن حالده، کوپراق ایجابی نتیجه آلیب کیله‌دی.
اونینگ سوزلریگه قره‌گن‌ده، اوباما نینگ بو قراری افغان ملی کوچلری روحی کوتاریلیشی باعث بوله‌دی. شونینگ‌دیک بو مساله تینچلیک مذاکره‌سی‌گه حاضر بولمه‌گن طالب‌لر اوچون هم یاروغ بیر پیام بولیشی ممکن.
افغانستانلیک ینه بیر سیاسی تحلیلچی عتیق الله امرخیل، 14 ییل آقیمی‌ده هم اقش جنگری طالب‌لرنی نابود قیلیش اوچون برچه امکاینت گه ایگه ایدی، لیکن بو یول‌ده اونچه‌لیک سعی حرکت ایتمه‌دی دیدی.
ایندی طالب‌لرنی نابود قیلیش اوچون جدی سعی و حرکت آلیب باره‌جک آق اوی رسمی‌لری‌نینگ مخصوص لایحه‌سی یا- ده او شکستی‌نی یاشیریشی ممکن دیگن.
او، زمان اوتیشی بیلن اوبامان‌نینگ بو قراری شعار یا – ده حقیقت بولیشی معلوم بوله دی دیگن. شونینگ‌دیک آق اوی رسمی‌سی‌نینگ بو تدبیری افغان ملی کوچلری روحی‌نی کوتاره دیدی دیگن.
امریکه‌نینگ بو قرارینی خوش قرشیلهگن افغانستان ملی مدافعه وزیرلیگی سوزلاوچی‌سی دولت وزیری، خلق ارا حربی‌لر بیلن افغان ملی کوچلری اورته‌سیده اویغونلیک یره‌تیش تینچ اهالی تلفاتی آلدینی آلیشی‌گه سبب بوله دی دیدی.
وزیریگه کوره، حاضرگی اوروش افغانستان تامانیدن یولگه قوییلمه‌گن بلکه چیگره‌لر نریاغیدن پلانلتشیریله‌دی. شونینگ‌دیک او، ترورچی‌لرنینگ اصلی مرکزی افغانستان‌دن تشقریده ایکن لیگینی تصدیق ایتگن.
امریکه جمهور رییسی بارک اوباما آلدین آلگن قراری اساسیده افغانستانده خلق ارا کوچلری نینگ عمومی سانی 9800 دن 5500 گه قیسقر تیریلیشی کوتیلردی.
بیراق، اخیرگی وقت‌لرده اقش‌نینگ بیر قنچه حربی رسمی‌لری، افغانستان وضعیتی‌نی نظرده توتگن حالده، چیت ایللیک حربیلرنینگ کته مقداری بومملکت‌ده قالیشی‌نی تکیلف قیلگن ایدیلر. ایتیلیشیچه، اوباما نینگ هم بو قراری، امریکه‌لیک حربی مامورلرنینگ ایسته گی اساسیده بجریلماقده.
