بوگون قندهار پولیس قومندانلیگی سوزلاوچیسی ضیاء درانی‌نینگ سلام‌وطندارگه ایتیشیچه، اوتگن کیچه سپین بولدک‌ده اویوشتیریلگن خودکش هجوم پاکستان استخباراتی و کویته کینگشی همکارلیگی‌ده ریجه‌لنگن.
اونینگ کوپه‌یتیریشیچه، هجومچی‌لرنینگ آلدیدن قورال اسلحه و باشقه مهمات‌لرگه قوشیمچه ایکی تیلفون دستگاهی قولگه کیلگن. درانی گه کوره، هجومچی‌لر اویوشتیریلگن هجوم دن آلدین و هجوم جریانیده نیچه مرته کویته کینگشی و باشقه استخباراتی اداره‌لر بیلن علاقه قوریب و او ییردن رهنمالیک قیلینگن.
اوتگن «چهارشنبه» کون کیچ قورون خودکش هجومچی‌لر قندهار ولایتی سپین‌بولدک تومنی‌نینگ پولیس قومندانلیگی و قتناو یول کندکی اوستیگه هجوم قیلگن‌لر.
اوشبو هجوم‌ده دستلب تورت خودکش هجومچی پارتلاوچی ماده جایلشتریلگن بیر موترسایکل‌نی سپین‌بولدک پولیس قومندانلیگی برابریده پارتلتگن و اوندن سونگ، مذکور قومندانلیک‌که کیرگن.
قندهار پولیس قومندانلیگی سوزلاوچیسی گه کوره، اوشبو هجوم کیچه ساعت 8:00 باشلنگن و ساعت 11 گچه دوام تارتگن؛ نتیجه‌ده 4 هجومچی و 3 پولیس هلاک و باشقه 3 پولیس یره‌لنگن.
شونینگ‌دیک، طالب‌لر بیر خبرنامه نشر قیلیب اویوشتیریلگن هجوم مسؤولیتی‌نی بوینیگه آلیب و ادعا قیلیشیچه، اوشبو گروه‌نینگ جنگریلری حربی کییم کییب بو هجومنی اویوشتیرگن و 20 دن آرتیق پولیس‌نی اولدیرگن.
طالبان گروهی سوزلاوچیسی قاری یوسف احمدی‌نینگ ایتیشیچه، اوشبو هجوم پولیس عسکرلر آوقت ییماققه توپلنگن چاغیده اویوشتیریلگن؛ بیراق قندهار امنیتی رسمی‌لری، طالب‌لرنینگ ادعاسینی رد قیله‌دی.
سپین‌بولدک تومنی دیورند چیزیغی‌نی 4 کیلومترلیگی‌ده جایلشگن.
