سيانان د دوو امریکايي چارواکو له قوله لیکلي چې امریکا د روان کال تر مني پورې له افغانستانه د خپلو څلور زرو نورو سرتېرو د اېستلو پر طرحې کار کوي.
اوس په افغانستان کې د امریکايي ځواکونو شمېر ۸۶۰۰ ته را کم شوی او د یادې طرحې په عملي کېدو سره به دا شمېره ۴۵۰۰ ته را ټیټه شي.
په راپور کې لیکل شوي چې د حکومت پر وړاندې د طالبانو د بریدونو له زیاتوالي سره سم د امریکايي ځواکونو د کمولو په اړه پرېکړه وروستۍ شوې نه ده.
که څه هم یاده پرېکړه تر اوسه وروستۍ شوې نه ده، خو د امریکا د دفاع وزیر مارک اېسپر د یادې طرحې په اړه له ناټو سره غږېدلی او د ناټو له چارواکو سره په بروکسېل کې پرې بحث شوی دی.
د امریکا او طالبانو د سولې هوکړهلیک له مخې چې د تېر کال په کب میاشت کې د قطر په دوحه کې لاسلیک شو، امریکا هوکړه وکړه چې په ۱۴ میاشتو کې به خپل ټول ځواکونه له افغانستانه وباسي.
د امریکا د پوځ مرکزي قوماندانۍ رییس مکېنزي تېره اوونۍ وویل چې امریکا په افغانستان کې د خپلو ځواکونو شمېر ۸۶۰۰ ته را کم کړی دی.
دا په داسې حال کې ده چې طالبانو لا هم له امریکا سره پر شوې هوکړې عمل نه دی کړی او د دولتي ځواکونو پر وړاندې یې خپلو بریدونو ته زور ورکړی دی.
