د افغانستان د سوداګرۍ او صنایعو خونې چارواکي وايي، چې افغان سوداګر له ګانډویو هېوادونو سره د ترانزیټ په برخه کې له موجودو ستونزو او د سارک وېزې نه لرلو له امله شکایت کوي.
د سوداګرۍ خونې د عامل رییس عتیق الله نصرت د پانګونې او سوداګریزو فرصتونو په موخه جوړې شوې غونډې کې وویل، چې سارک سازمان د سټېکر سارک په نوم ګروپي وېزه جوړه کړې ده، چې په دې وېزې سره د دې سازمان ټولو غړیو هېوادونو ته سوداګر تګ را تګ کولی شي.
دی وايي، چې دغه وېزه تر اوسه هیڅ افغان سوداګر ته نه ده ورکړل شوې.
نصرت د ملي یووالي حکومت له مشرانو او له بهرنیو چارو وزارت وغوښتل، چې افغان سوداګرو ته د سارک وېزې اسانتیا برابره کړي.
له بل لوري په دې غونډه کې د سارک سازمان د سوداګرۍ خونې رییس سورج وادیا په دې غونډه کې وویل، چې په افغانستان کې غوره اقتصادي فرصتونه شته دي، خو ناامنیو د سارک غړیو هېوادونو د پانګونې مخه نیولې ده.
د سارک سازمان د سوداګرۍ خونې رییس وویل، دی به افغان سوداګرو د ستونزو د حل له پاره د سارک غړیو هېوادونو له مشرانو سره خبرې وکړي.
ده همدا ډول له افغان حکومته وغوښتل، چې په افغانستان کې د پانګونې له پاره زمېنه برابره کړي.
په دې غونډه کې د سوداګرۍ وزارت مرستیال مزمل شینواري وویل، چې افغان حکومت د پانګونې په برخه کې د سارګ غړیو هېوادونو له پاره د زمېنې برابرولو او همکاریو هڅه کوي او زیاته یې کړه، چې د سارک وېزې د ستونزو حل له پاره یې د بهرنیو چارو وزارت له چارواکو سره خبرې اترې کړي دي.
د سوداګرۍ او صنایعو خونې د مسوولینو په وینا، افغان سوداګر تل د هېوادونو د سیاسي اړیکو له امله اغیزمن شوي دي او سیاسي ستونزو د دوی اقتصادي چارو ته زیان اړولی دی.