سرپل ولایتی نینگ سانچارک تومنیده ناتینچلیکلر کینگهیگنیدن سونگ، طالبان مذکور تومن یولی ده چِکپاینتلر قوریب یوللاوچی و یوک تاشیووچی موترلردن پول آلهدی.
سلاموطندارگه صحبت بیرگن سانچارک تومنی ولسوالی نقیبالله دقیق نینگ ایتیشیچه، طالبان سانچارک، گوسفندی و بلخاب تومنلری یشاوچیلریدن هر کون 5 مینگ افغانی دن باشلب 40 مینگ افغانی گچه پول توپلهیدی.
سانچارک ولسوالی گه کوره، طالبان بونچه پول نی کوندهلیک 100 کیچیک و کته موتردن زورغه توپلهیدی و پول بیریش دن باش تارتگنلرنی اهالی حضوریده قمچیلیدی.
سانچارک تومنی یشاوچیلریدن بیرقطاری، مذکور تومنده ناتینچلیکلر کینگهیگنیدن خواطر بیلدیریب ایتیشیچه، شو یوزهدن اونلرچه عایله سانچارک دن باشقه ولایتلرگه بدرغه بولیشگن.
اولر حکومت دن یول خوفسیزلیگی تأمینلنیشی اوچون چاره تدبیر کوریشینی سورهگن.
اوشبو سوزلرنی تصدیقلگن سرپل پولیس قومندانلیگی سوزلاوچیسی نورآغا فیضی نینگ ایتیشیچه، طالبان گروهی نینگ باج آلیشلری آلدی آلینیشی اوچون یقین آرهده سانچارک و سرپل نینگ باشقه تومنلریده تازهلش حربی عملیات یولگه قوییلهدی.
طالبان گروهی حاضرگهقدر بو بیانات توغریسیده هیچ نرسه دیمهگن.
سانچارک سرپل ولایتی نینگ ناتینچ تومنلریدن بیری سنلهدی و طالبان گروهی مذکور تومن نینگ کوپینچه قتناو یوللرینی امنیتی کوچلرنینگ یوزیگه باغلهگن.
شو توغریده…
طالبان گروهی جوزجان-بلخ قتناو یولیده موترلردن باج آلهدی
