سرپل ولایتی‌نینگ قطار تومن‌لریدن قولگه کیریتیلگن معلومات‌لرگه کوره، حاضرده 150 باله طالبان تامانیدن پاکستان‌گه یوباریله‌گن و اولر پاکستان دینی مدرسه‌لرگه تعلیمات کوره‌دیلر.
مذکور باله‌لردن بیرقطاری تعلیم دوره‌سی یکونلنگنی‌دن سونگ، قیته‌دن سرپل، جوزجان و فاریاب ولایت‌لریده کیلگن‌لر.
سلام‌وطندار اختیاریگه قرار تاپگن معلومات‌لرگه کوره، اوشبو کیشی‌لردن بیرقطاری مذکور ولایت‌لرده پاکستان‌لیک متقاعد جنرال‌لر نظریده عصیان‌چیلیک، ماین جای‌لشتیریش و هجوم قیلیش خصوصیده تعلیم کوره‌دیلر.
سرپل حاکمی عبدالقادر آشنا نینگ تاکید قیلیشیچه، طالبان گروهی اهالیگه قرشی هیچقندی ظلم و زوره‌وانلیک‌دن قول تارتمه‌یدی و باله‌لرنی خودکش هجوم و عصیان‌چیلیک خصوصیده تعلیم کوریش اوچون پاکستان‌گه یوباره‌دی.
سرپل ولایتی کینگش اورین باسری سید اسدالله دانش نینگ سلام‌وطندارگه ایتیشیچه، طالبان و دولت نظارتی‌گه بولگن منطقه‌لرده دینی مدرس‌لر فعال دیر و بو مدرسه‌لر طالب تولید قیله‌دی.
سرپل ولایتی کینگش اورین باسریگه کوره، دولت دینی مدرسه‌لردن نظارت قیلمه‌یدی و پاکستان‌ده تحصیل قیلگن ملالردن کوپ قطاری باله‌لرنی عصیان‌چیلیک‌که دعوت قیله‌دی.
سرپل یشاوچی‌لریدن بیرقطاری نینگ طالبان فعالیتی کوپه‌یگنی دن خواطر بیلدیریب ایتیشیچه، بونده‌ی فعالیت‌لرگه توسیق بولینمه‌گن حالده، مملکت شمالی ولایت‌لری نینگ وضعیتی یمان بوله‌دی.
بو توغریده سرپل ولایتی بوییچه حج و اوقاف ریاستی مسووللری نینگ فکرینی آلیش اوچون سعی و حرکت قیلدیک، بیراق موفق بولمه‌دیک.
عین‌حالده، طالبان سوزلاوچی‌لریدن بیری قاری یوسف احمدی، باله‌لرنی قاچاق ایتیلیب و اولرگه خودکش هجوم خصوصیده تعلیمات بیریلیشی‌نی رد قیله‌دی.
