ستانکزی: زمبابوې نه غوښتل وروستۍ لوبه بشپړه شي

د افغانستان د کرکټ ملي لوبډلې کپټان اصغر ستانکزي په زمبابوې کرکټ بورډ تور ولګولو، چې نه یې غوښتل وروستۍ ۵ پنځوس اوریزه سیالي بشپړه شي.

اصغرستانکزي د کرکټ بورډ له خوا په یوې خپرې شوې ویډیو کې ویلي د باران پرمهال د زمبابوې هراري کرکټ لوبغالي کارکوونکو لټي کوله او د لوبې نه بشپړېدو پوره کوښښ یې کولو؛ خو دوی اجازه ورنه کړه.

ستانکزی وايي، کومه سیالي چې د زمبابوې په ګټه وه په هغې کې د لوبغالي شاوخوا ۳۰ کارکوونکو او ان د ټول لوبغالي له لمدېدو څخه د ژغورنې هڅه کوله.

د ده په خبره، وروستۍ برخلیک ټاکونکې سیالۍ یې په ګټه نه وه او د لوبغالي هېڅ کارکوونکی د باران په وخت کې موجود نه و.

کپټان وویل، کله یې د زمبابوې کرکټ بورډ دغه شوم پلان او لټي ولېدله نو خپلو لوبغاړو ته یې وویل، چی په خپله دې په پېچ او شاوخوا میدان ترپالونه هوار کړي او د لوبغالي لمدېدو مخنیوی دې وکړي.

د نوموړي پر وینا، که دوی په خپله لاس په کار شوی نه وی؛ کوربه لوبډلې د باران په پلمه د وروستۍ لوبې ترسره کول نه غوښتل.

اصغر ستانکزي وویل، لوبه بریا او ماته لري، خو مینه وال دې په سختو حالاتو کې هم د لوبډلې ملاتړ وکړي.

نوموړي وویل، د لوبغاړو مورال اوچت دی او د ایرلینډ خلاف به هم ښې لوبې کوي او له اتلولۍ سره به هېواد ته راستنېږي.

ټاکل شوې، د کرکټ ملي لوبډله د مارچ په ۸ نېټه له ایرلینډۍ کرکټ ملي لوبډلې سره له ۴ ورځنیو او ۵ پنځوس اوریزه لوبو مخکې د ۳ شل اوریزه لوبو لړۍ پیل کړي.

د لوبډلې مدیر شیراغا همکار وايي، د ایرلینډ خلاف د بېلابېلو ۲۰ اوریزه، ۵۰ اوریزه او څلور ورځنیو سیالیو له پاره به د غوراوي کمېټه یو شمېر نور لوبغالي هم هندوستان ته ورولېږي، چې دا مهال له ملي لوبډلې سره یو ځای شوي نه دي.

دغه راز دغوراوي کمېټې مشر نوروز منګل نن د یوې خبري غونډې پرمهال د هندوستان په کوربتوب د ایرلیند خلاف بېلابېلو کېدونکو ۹ سیالیو ته د افغانستان کرکټ ملي لوبډله په رسمي توګه اعلان کړي.