ستانکزی: افغانستان کې باید د جګړې جغرافیه بدله شي

د هېواد د دفاع سرپرست وزیر معصوم ستانکزی د وضعیت څېړنې، د پرېکړو او سرتېرو سره د کتنې له پاره هرات ته تللی، چې د یو خبري کانفرانس پر مهال یې سرتېرو ته د هوايي اکمالاتو د پیاوړتیا او د بندو لارو د خلاصون ترڅنګ په لوړې انګیزې ټېنګار وکړ.

ښاغلي ستانکزي په خپلو خبرو کې زیاته کړه، چې په افغانستان کې د جګړې جعرافیه باید بدلون ومومي.

د دفاع وزیر د داعش په اړه وویل، چې پر وړاندې یې غلي نه دي ناست او د دې ډلې د ځپلو له پاره یې لازم تدابیر نيولي دي.

هغه زیاته کړه، چې په دې برخه کې باید جګړه له کليو وویستلی شي، چې ددې کار له پاره د دفاع وزارت هڅې پېل کړي دي.

ستانکزي د افغانستان د جګړې لامل له پولو بهر یاد کړ او زیاته یې کړه، چې د افغانستان سوله او ټېکاو د ټولې سیمې په ګته دی.

په همدې حال کې د دفاع وزارت ویاند جنرال دولت وزیري وايي، چې دوی هڅه کوي په ژمي کې د وسله والو مخالفينو ټول پټن ځایونه په نښه کړي او له منځه یې یوسي.

همدا ډول چارواکو له ملي اردو څخه د خلکو د ملاتړ قدرداني وکړه او ټېنګار یې وکړ، چې ولسي وګړي دې د امنيتي سرتېرو سره خپله همکاري زیاته کړي.

د جګړې د جعرافیې د بدلون په اړه له پخوا راهيسې تحلیل ګران وايي، چې په کلیو کې جګړه د دې سبب کيږي، چې د ولسي تلفاتو د رامنځته کېدو له ویرې افغان امنیتي ځواکونه ونه شي کولی، چې د وسله والو په خلاف په ازاد لاس جګړه وکړي.

خو بل لوري هراتي چارواکو او استازو له دفاع وزارت څخه وغوښتل، چې د دغه ولایت امنيتي وضعیت ته پاملرنه وکړي او ترڅنګ یې د هرات ولایت نظامي کسان په دفاع وزارت کې په لوړو څوکيو وګوماري.