تورموش اورتاغی‌نینگ خانه‌دانی تامانیدن اوتده یاندیریلیب اولدیریلگن غورلیک عیال اوچون دادخواهلیک قیلگن‌لرنینگ ایتیشیچه، زهرانینگ قتلی‌گه قولی بولگن‌لر محاکمه بولیب، جزاله‌نیشی اوچون حکومت بوتون ایستک‌لریگه ایجابی جواب بیرگن.
زهرا اوچون دادخواهلیک قیلیب تیکلنگن چارد 24 کوندن سونگ ییغیلدی. اونینگ کویگن جسدی بوگون کابل‌نینگ بی‌بی مهرو تیپه‌لیگی‌ده توپراققه تاپشیریلدی.
مدنی فعال ویدا ساغری‌نینگ ایتیشیچه، زهرانی اولدیرگن‌لر کابل‌گه کیلتیریلیشی، اونینگ دوسیه‌سی غوردن کابل‌گه آلیب کیلینیشی، قتل عامل‌لر اوستیدن آچیق محکمه اوتکزیلیشی‌دن عبارت اوچ اساسی ایستک‌لریگه حکومت تامانیدن ایجابی جواب بیریلگن.
خانم ساغریگه کوره، زهرا اوچون 24 کون دادخواهلیک جریانی‌ده مملکت بویلب عیال‌لرگه قرشی 13 مورد زوروانلیک یوز بیرگن بونینگ تورت موردی ایسه غور ولایتی‌ده عمل‌گه آشیلریلگن.
شونینگ‌دیک خانم ساغری‌نینگ ادعا قیلیشیچه، آلدین‌لری فقط ایرکک‌لر عیال‌لرگه قرشی زورانلیک حال‌لرینی یاشیریش‌گه حرکت قیلردی ایندی ایسه عاموی اخبارات واسطه‌لری هم بو ایش‌گه قوشیلگن. او، قندهار، غور و بامیان ولایت‌لریده خاتین – قیزلر گه ضد صادر بولگن زوروانلیک‌لر اخبارات واسطه‌لری آرقه‌لی یاروتیلمه‌گن لیگینی مثال قیلیب کورستگن.
عین حالده، زهرانینگ آته‌سی محمداعظم بلاغت‌گه ییتمه‌گن ایکی قیزینی تورموش‌گه چیقارگن‌لیگی توغریسی‌ده‌گی ادعانی رد قیلگن.
غور ولایتی فیروز کوه تومنی‌نینگ یشاوچی‌سی 14یاشر زهرا اوتگن آی تورموش اورتاغی‌نینگ خانه‌دان اعضاسی تامانیدن کویدیریلیب، سونگ کابل نینگ استقلال ساغلیق‌نی سقلش مرکزیگه آلیب کیلینگن ایدی.
حادثه آرتی‌دن کابل‌نینگ علاوالدین پارکی‌ده تحصن خیمه‌سی تیکله‌گن زهرانینگ آته – آنه‌سی قیزی‌نینگ قتل قیلگن‌لر جزالنمه‌گن حالده، زهرانینگ جسدی توپراققه تاپشیریلیشی اوچون رخصت بیرمس‌لیگی حقیده آگاهلنتیرگن ایدی.
