محمداشرف غنی، رییس جمهور کشور امروز (سه‌شنبه) در یک سفر رسمی به تاجیکستان رفت.
دواخان مینه‌پال، معاون سخنگوی ریاست جمهوری به سلام‌وطندار می‌گوید که آقای غنی در این سفر دوروزه، پیرامون مسایل امنیتی و اقتصادی با امام‌علی رحمان، رییس جمهور تاجیکستان و سایر مقام‌های بلندپایۀ این کشور بحث و گفت‌وگو خواهد کرد.
مینه‌پال می‌افزاید که رییس جمهور غنی در دیدارهای جداگانه با رییس مجلس نماینده‌گان و نخست‌وزیر تاجیکستان نیز، در مورد مسایل اقتصادی و همکاری‌های امنیتی تبادل نظر می‌کند.
به گفتۀ مینه‌پال، در این سفر برخی تفاهم‌نامه‌ها نیز میان مقام‌های افغانستان و تاجیکستان امضا خواهد شد.
برپایۀ خبرنامه‌یی که از سوی کاخ ریاست جمهوری نشر شده است، رییس جمهور غنی قرار است در دانشگاه دولتی تاجیکستان نیز سخنرانی کند.
رییس جمهور غنی را در این سفر، صلاح‌الدین ربانی، وزیر امور خارجه، علی‌احمد عثمانی، وزیر انرژی و آب، فرید حمیدی، دادستان کل و قدرت‌الله دلاوری، رییس شرکت برشنا همراهی می‌کنند.
