رییس جمهور به ازبکستان رفت

محمداشرف غنی چاشت امروز (پنج‌شنبه) در رأس یک هیأت بلندپایۀ دولتی، برای اشتراک در شانزدهمین اجلاس سران سازمان همکاری‌های شانگهای به تاشکند پایتخت ازبکستان رفت.

آقای غنی در این سفر دو روزه بر علاوۀ اشتراک در نشست شانگهای، با رییس جمهور کشورهای ازبکستان، چین، تاجیکستان، قزاقستان، قرقیزستان و ترکمنستان دیدار خواهد کرد.

شکیب مستغنی سخنگوی وزارت خارجه می‌گوید که رییس جمهور در این سفر، روی همکاری‌های منطقه‌یی در عرصۀ اقتصاد، امنیت و مبارزه با تروریسم صبحت خواهد کرد.

سخنگوی وزارت خارجه می‌گوید که بر اساس پیشنهاد پاکستان، احتمالاً سران دو کشور افغانستان و پاکستان با یکدیگر دیداری خواهند داشت و بر روی مسایل اقتصادی، امنیتی و مبارزه با تروریسم گفت‌وگو خواهند کرد.

سازمان همکاری شانگهای سازمانی میان‌دولتی است که برای همکاری‌های چندجانبه امنیتی، اقتصادی و فرهنگی تشکیل شده‌ است. اعضای اصلی این سازمان روسیه، چین، قزاقستان، قرقیزستان، تاجیکستان و ازبکستان و همچنین اعضای ناظر آن ایران، هندوستان، پاکستان، مغولستان و افغانستان می‌باشند.