عبدالله عبدالله، رییس اجرایی حکومت وحدت ملی صبح امروز (دوشنبه) در رأس یک هیأت بلندپایۀ دولتی در سفری دو روزه به تاجیکستان رفت.
بر بنیاد خبرنامه‌یی که از سوی ریاست اجرایی به نشر رسیده، عبدالله در این سفر با رییس جمهور و نخست‌وزیر تاجیکستان دیدار و گفت‌وگو خواهد کرد.
در خبرنامه آمده است که رییس اجرایی در دیدار با مقام‌های تاجیکستان دربارۀ «گسترش و تحکیم روابط سیاسی٬ اقتصادی٬ فرهنگی٬ مبارزه با تروریسم و تهدیدهای امنیتی مشترک، مبارزه با مواد مخدر، تمدید خط انتقال برق از کشورهای آسیای میانه به آسیای جنوبی و ایران از طریق افغانستان٬ اعمار خط آهن میان کشورهای منطقه٬ موافقت‌نامۀ سه‌جانبۀ تجاری و ترانزیتی پاکستان٬ افغانستان و تاجیکستان و گسترش همکاری‌های منطقه‌یی» گفت‌وگو خواهند کرد.
ریاست اجرایی در خبرنامه‌اش گفته که انتظار می‌رود در جریان این سفر رییس اجرایی، چندین موافقت‌نامۀ همکاری میان افغانستان و تاجیکستان به امضا برسد.
هم‌چنان قرار است آقای عبدالله در جریان این سفر در نشست بین‌المللی «آب برای حیات» که در دوشنبه تاجیکستان با حضور دبیرکل سازمان ملل و نماینده‌گان بیش از صد کشور جهان برگزار می‌شود، اشتراک و سخنرانی کند.
رییس اجرایی را در این سفر صلاح‌الدین ربانی وزیر خارجه، علی‌احمد عثمانی وزیر انرژی و آب، عبدالستار مراد وزیر اقتصاد، محمود صیقل مشاور ارشد ریاست اجرایی، ظاهر اغبر مشاور امنیتی رییس اجرایی، معاونان وزارت‌های تجارت و صنایع، فواید عامه و معادن و مجیب‌الرحمان رحیمی سخن‌گوی ریاست اجرایی همراهی می‌کنند.
آقای عبدالله هنگام رسیدنش به شهر دوشنبه، از سوی نخست‌وزیر و شماری دیگر از مقام‌های بلندپایۀ تاجیکستان استقبال شد.
