په افغانستان کې د روسيې فدراتیف چارواکي وايي، چې د طالبانو په اړه د روسيې جګپوړي چارواکي څرګندونې غلطې تعبير شوې دي.
په کابل کې د روسیې سفير الکساندر مانتیتسکي وايي، چې د افغانستان له پاره د روسيې فدراتیف ځانګړي استازي د ضمیر کابلوف څرګندونې د رسنيو له لوري غېر دقیق تعبیر شوی او هغه څه يې نه دي ویلي کوم، چې په رسنيو کې انعکاس کړی.
د هغه پر وينا، د کابلوف له څرګندونو دقیق دا مطلب وو، چې يوازې د داعش پر ضد د جنګ په برخه کې د طالبانو او روسيې موخې سره ورته والی لري او له طالبانو سره د دوی اړيکې يوازې په افغانستان کې د جنګ درولو له پاره د سياسي حل لارې لټول و.
دا په داسې حال کې ده، چې تېره اوونۍ د کابل له پاره د روسیې ځانګړي استازي ضمیر کابلوف هغه خبرې، چې طالبانو ته ورته موخې لري، د ولسي جرګې د ځېنو غړو له سخت غبرګون سره مخ شوې.
کابلوف تېره پنجنشبه له یوې بهرنۍ رسنۍ سره په خبرو کې ویلي وو، چې د اسلامي دولت یا داعش ډلې پر خلاف په مبارزه کې مسکو او طالبان ورته ګټې لري.
نن یکشنبه (ډسمبر۲۷مه) سنډي ټایمز ورځپاڼې لیکلي، چې د روسيې ولسمشر ولادیمير پوتین او د طالبانو مشر ملااختر محمد منصور په تاجکستان کې سره ليدلي دي.
په دغه ورځپاڼه کې راغلي، چې پوتين د طالبانو مشر ته ویلي، چې دوی څنګه کولی شي په ګډه د داعش ډلې د ځپلو له پاره مبارزه وکړي.
کابلوف د نورو جزیاتو له ورکولو پرته ویلي وو، چې مسکو له طالبانو سره د مالوماتو د تبادلې له پاره ارتباطي شبکې جوړې کړي دي.
د ولسي جرګې زیات شمېر وکیلانو په تېره عمومي غونډه کې د کابلوف دا ډول څرګندونې د افغانستان په کورنیو چارو کې په ښکاره توګه لاسوهنه وبلله.
دوی پر بهرنیو چارو وزارت نیوکې وکړې، چې ولې د نورو هېوادونو د دا ډول څرګندونو په مقابل کې غلي پاتې شوي دي.
دوی همداراز زیاته کړه، چې افغانستان د سترو قدرتونو د جنګ مرکز ګرځېدلی دی او نور د دې توان نه لري، چې دا ډول خبرې وزغمي.
د ولسي جرګې غړې شینکۍ کړوخېل د داسې څرګندونو سرچینه د دې جرګې د ځېنو وکیلانو د بې بندوبارو خبرو پایله ګڼي.
د بهرنيو چارو وزارت څخه په رالېږل شوې خبر پاڼه کې راغلي، چې په کابل کې د روسيې سفير ټينګار کړی، چې هېواد يې د يو ازاد، خپلواک، له مخدره توکو او تروریزم پرته، باثباته او د یو ملي حاکمیت لرونکي افغانستان څخه ملاتړ کوي.
