رقیه؛ هغه ښځه چې پخواني مېړه ووژله

د بغلان ولایت د خنجان ولسوالۍ امنیه قومندان قدرت الله څپاند په دغې ولسوالۍ کې د رقیې په نامه د پخواني مېړه له خوا د یوې ښځې د وژل کېدو خبر ورکوي. د څپاند پر وینا، دغه ښځه تېر ماښام د کورنیو ستونزو له امله په عام محضر کې وژل شوې ده.

څپاند وايي، مجرم نیول شوی او پلټنې ترې روانې دي.

د دغه ولایت د ښځو چارو رییسه خدیجه یقین په دې اړه وايي، قاتل «یقعوب» نومېږي او خپله پخوانۍ ۲۳ کلنه ښځه رقیه یې له دې امله طلاق کړې وه، چې په ۳ کلونو کې یې د دوی په کور کې اولاد ونه زېږولو. خدیقه وايي، رقیه مخکې له دې، چې طلاق شي؛ د مېړه د کورنۍ له خوا وهل شوې ده.

خو د رقیې پلار حاجي کریم وايي، د لور مېړه یې د دویم واده پلان درلود او څه موده وړاندې یې هغې ته طلاق ورکړی و. هغه وايي، لور یې ځکه د یقعوب له خوا ووژل شوه، چې نه یې غوښتل وروسته له طلاقه د هغه په کور کې پاتې شي.

د رقیې پلار له عدلي او قضايي ارګانونو نه غواړي، چې یعقوب ته سزا ورکړي، ځکه چې وروسته له دې بل څوک دا ډول کار ونه کړي.

د راپورونو پر بنسټ، په روان کال کې د تېر هغه په پرتله له ښځو سره د تاوتریخوالی کچه ۷،۳۲ سلنه زیاته شوې ده. دا په داسې حال کې ده، چې د تېر لمریز کال په لومړیو شپږو میاشتو کې د بشري حقونو له خپلواک کمېسیون سره د ښځو د تاوتریخوالي ۲۴۰۳ موارد ثبت شوي وو، خو په دې کال کې دغه موارد ۲۵۷۹ ته رسېدلي دي.