عبدالله عبدالله، رئیس اجرایی کشور امروز برای اشتراک در هجدهمین نشست سران حکومت‌های سازمان همکاری شانگهای به اوزبیکستان رفت.
ریاست اجرایی با نشر خبرنامه‌یی می‌گوید، آقای عبدالله افزون بر اشتراک در هجدهمین نشست سران حکومت‌های سازمان همکاری شانگهای، به نماینده‌گی از حکومت افغانستان در این نشست سخنرانی خواهد کرد.
در خبرنامۀ ریاست اجرایی آمده است که آقای عبدالله قرار است در حاشیۀ این نشست با نخست‌وزیران روسیه، اوزبیکستان، قزاقستان، قرغیزستان، تاجیکستان، معاون اول رئیس‌جمهوری ایران، وزیر دفاع هند و سکرترجنرال سازمان همکاری شانگهای دیدار و گفت‌وگومی‌کند.
بر اساس معلومات خبرنامۀ ریاست اجرایی، در نشست سران حکومت‌های سازمان همکاری‌های شانگهای در باره تحولات سیاسی-امنیتی منطقه، همکاری‌های اقتصادی، سرمایه‌گذاری‌های مشترک، توسعه، مقابله با دهشت‌افگنی، افراط‌گرایی و چالش‌های مشترک منطقه‌یی گفت‌وگو می‌شود.
سازمان همکاری شانگهای یک سازمان میان‌دولتی است که برای همکاری‌های چندجانبه امنیتی، اقتصادی و فرهنگی تشکیل شده‌است. این سازمان در سال ۲۰۰۱ توسط رهبران چین، روسیه، قزاقستان، قرغیزستان، تاجیکستان و اوزبیکستان پایه‌گذاری شد.
در همین زمینه:
اوزبیکستان 45 میلیون دالر در انتقال لاین برق به افغانستان تخفیف داد
